Panèu de sinhalisacion rotiera
From Wikipedia, the free encyclopedia
Un panèu de sinhalisacion rotiera es un element de sinhalisacion rotiera plaçat sus lo costat d'una rota per facilitar la circulacion, informar sus la preséncia d'un perilh ò donar d'informacions relativas sus l'usatge de la via. Atestats tre l'Antiquitat dins l'Empèri Roman (tèrmes militars...), lei panèus primitius indicavan lei direccions e lei distàncias fins a Roma. Durant l'Edat Mejana, lei panèus direccionaus venguèron mai e mai frequents. Inicialament escrichas sus de tèrmes, leis indicavions foguèron portadas per de placas a partir dau sègle XVIII. Durant la premiera partida dau sègle XIX, la placa de fonda fixada a una muralha, una colona ò un pau metallic venguèt la nòrma. Es a l'origina dau panèu actuau. Pasmens, a la fin dau sègle XIX, l'aparicion de l'automobila entraïnèt una aumentacion fòrta dei besonhs que menèt, en 1909, a la signatura de la convencion internacionala de Genèva destinada a estandardizar la sinhalisacion rotiera. Aquò menèt a l'introduccion de pictogramas ò d'imatges per remplaçar lei tèxtes e a una aumentacion importanta dau nombre de panèus (4 en 1909 en França, 384 en 2007).