Comèrci transsaharian
From Wikipedia, the free encyclopedia
Lo comèrci transsaharian designa lo comèrci entre lei país mediterranèus e l'Africa Subsahariana a travèrs de Sahara. Fondat sus lei caravanas, aqueu comèrci se desvolopèt a partir dau sègle VII e agantèt son apogèu entre lo sègle XIII e la fin dau sègle XVI. Après aquela data, declinèt en causa de la concurréncia dau comèrci maritim. Lei bens cambiats (metaus preciós, sau, evòri, esclaus, etc.) assegurèron la prosperitat de plusors reiaumes sahelians. Aqueu comèrci aguèt tanben un ròtle major dins la difusion de l'islam en Africa. Lo declin dau comèrci transsaharian foguèt progressiu car lei rotas orientalas demorèron activas fins au començament dau sègle XX. Uei, quauqueis activitats comercialas dins lo desèrt constituïsson una subrevivença dau comèrci transsaharian mai representan un volum marchand fòrça feble.