From Wikipedia, the free encyclopedia
La campanha de Vicksburg es un ensemble d'operacions militaras que se debanèron dau 26 de decembre de 1862 au 4 de julhet de 1863 durant la Guèrra de Secession. Opausèt l'armada unionista dau generau Ulysses S. Grant ai fòrças confederadas dau generau John C. Pemberton. S'acabèt per una victòria dau Nòrd, succès que foguèt la premiera etapa dins la desfacha dau Sud.
A la fin de 1862, lo Nòrd èra en superioritat numerica mai aviá de dificultats importantas per combatre lo Sud que dispausava de tropas pus experimentadas. Pasmens, maugrat una tiera d'ofensivas arrestadas, lo Nòrd aviá enregistrat quauquei succès coma la presa per suspresa de la Nòva Orleans (1èr de mai de 1862) e la conquista de Tennessee a l'eissida de la batalha de Shiloh (6-7 d'abriu de 1862). A tèrme, aquelei succès menaçavan de copar lo territòri dau Sud. Per aquela rason, lei Confederats fortifiquèron la vila de Vicksburg, situat sus una bòna posicion defensiva, lòng de Mississipí.
L'ofensiva nordista còntra Vicksburg comencèt en decembre de 1862 per d'operacions preliminàrias que permetèron d'organizar una ataca dirècta a partir dau 26. Pasmens, entre genier e març de 1863, lei paluns de Mississipí bloquèron aisament totei lei projèctes de Grant (construccion d'un canau, ataca per de rius segondaris... etc.).
Finalament, a la fin d'abriu, lo cap unionista decidèt de cambiar totalament de plans. Gràcias a de fintas destinadas a atraire l'atencion de Pemberton vèrs lo nòrd, poguèt embarcadar sei fòrças, passar de nuech davant la garnison de Vicksburg e desbarcar au sud de la vila. Aquò li permetèt de trobar de rotas practicablas. De mai, lo movement susprenguèt lei Sudistas que reagiguèron tardivament. Aprofichant aqueu retard, Grant poguèt atacar vèrs lo nòrd per se plaçar a l'èst de Vicksburg e isolar sei defensors entre Mississipí e son armada.
La temptativa de sortida de la garnison foguèt rebutada a la batalha de Champion Hill (16 de mai de 1863). Aquò permetèt ai Nordistas de començar lo sètge dirècte de la vila lo 18 de mai. La garnison resistiguèt amb acarnament car dispausava d'una artilhariá poderosa. Pasmens, lei còntra-ofensivas sudistas per liberar la vila dempuei l'èst mau capitèron, e la vila capitulèt lo 4 de julhet de 1863.
Lei pèrdas umanas de la campanha foguèron relativament equilibradas amb aperaquí 10 000 tuats e bleçats dins lei rengs nordistas e 9 000 dins aquelei dau Sud. Pasmens, 30 000 Confederats foguèron capturats. De mai, après la presa dei darrierei posicions sudistas lòng de Mississipí, lo territòri dei rebèls èra desenant copat, çò que privèt leis armadas sudistas dei renfòrç en provenància de Tèxas.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.