From Wikipedia, the free encyclopedia
La bauma de Vilonor se dubrís en riba mança de la vau de Tardoira, en Charanta Occitana. Fuguet renomenada bauma dau Visatge per evitar tota confusion emb d'autras baumas situadas dins la mesma comuna, fasent referéncia a 'na pintura parietala d'un visatge estilizat que s'inscriu dins 'na concrecion naturala evocant 'na testa emb sa chabeladura.
La preséncia d'òbras parietalas paleoliticas e d'ossamentas umanas e animalas fuguet reconeguda en decembre de 2005, en seguda de doas annadas d'exploracions espeleologicas. D'en prumier, las òbras parietalas fugueren atribuidas au Paleolitic Superior e mai precisament au Gravetian (aperaquí 28 000 a 22 000 ans avans lo present) a partir de las comparasons estilisticas. Las òbras son doncas mai ancianas que las de Las Caus.
En mai d'un visatge pintat, la bauma conten daus signes (pontuacions e trachs) e 'na man negativa fòrça bela. Los artistas emplegueren emb vivacitat lo releu naturau de la paret per metre lors òbras e aitau ressortir d'unes elements e suggerir probablament daus animaus: equid, felin, ors o rangier. 'Questas descubertas enriquigueren las coneissenças de 'queu periòde, e mai se son pas tan extraordinàrias coma las d'autras baumas ornadas.
Daus òs umans fugueren descuberts au mieg d'un talus dins la sala prepa dau visatge. En mai de 'quò, se trobet un crani en perfecte estat mas sens sa mandibula dins 'na pita cavitat a l'extrem d'un budeu accessible dempuei la sala dau visatge; vist son emplaçament e sa posicion 'queste crani i fuguet depausat intencionalament mas se sap pas enguera se 'queste crani e los òs de la bauma apertenen au mesme individú.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.