Marianne Dahlmo

Marianne Dahlmo (fødd 1. mai 1965) er ein norsk tidlegare langrennsløpar frå Bodø. Ho vann fire renn i verdscupen i langrenn i tida 1986-89, og enda på andreplassen i verdscupen 1986 og på tredjeplassen sesongen etter. Dahlmo, som var medlem av Bodø & Omegn IF, vart dobbel noregsmeister i 1986 og fekk tre stafettmedaljar med Noreg i åra 1987-89. Ho var ein av dei første kvinnelege langrennarane som meistra skøyteteknikken.

Marianne Dahlmo
Statsborgarskap	Noreg
Fødd	5. januar 1965 (59 år) Bodø
Idrett	langrenn
Tok del i	Vinter-OL 1988, Ski-VM 1987, Ski-VM 1989, Ski-VM 1991, Ski-VM 1993

Aktiv

Dahlmo debuterte i verdscupen i Davos 18. desember 1984. Ho fekk sin fyrste pallplass då i byrjinga av mars 1985 vart nummer tre på ein 5 kilometer i Lahti. Sin fyrste siger i eit verdscuprenn tok ho på 20 km i Oberstdorf 15. februar 1986. Kvar av dei neste tre sesongane vann ho eit renn verdscupen, den fjerde og siste sigeren kom på 10 km i Klingenthal den 10. januar 1989. Både i 1986- og 1987-sesongen kjempa ho om å vinne verdscupen for kvinner, men vart nummer to i 1986 og tre året etter, begge gongane var det finske Marjo Matikainen som sikra seg FIS-pokalen.

Dahlmo deltok i alle fire verdsmeisterskapane på ski i perioiden 1987 til -93. Hennar beste individuelle plasseringar var to femteplassar, fyrst på 10 km i 1987 og så 5 km i 1991. Både i VM 1987 og OL 1988 gjekk ho for Noregs to sølvlag i 4 x 5 km stafett, medan ho i 1989 fekk ein bronsemedalje på stafetten under ski-VM i Lahti.

I 1986 vart Dahlmo norsk meister både på 5 km og 20 km. Dei neste fire åra, 1987-90, sikra ho seg fire NM-sølv og like mange NM-bronsar.

Ho la opp etter 1994-sesongen.

Medaljar og besteplasseringar i internasjonale meisterskap

• Ski-VM 1987 i Oberstdorf: Sølvmedalje på stafetten, nr 5 på 10 km
• Vinter-OL 1988 i Calgary: Sølvmedalje på stafetten, nr 8 på 20 km
• Ski-VM 1989 i Lahti: Nr 6 både på 10 km og på 30 km, bronsemedalje på stafetten
• Ski-VM 1991 i Val di Fiemme: Nr 5 på 5 km
• Ski-VM 1993 i Falun: Nr 19 på 5 km

Medaljar og besteplasseringar i noregsmeisterskap

• Ski-NM 1986: Gullmedalje både på 5 km og 20 km på Vang
• Ski-NM 1987: Sølvmedalje både på 5 og 10 km i Steinkjer
• Ski-NM 1988: Sølvmedalje på 20 km, bronse på 5 km på Vang
• Ski-NM 1989: Sølv på 10, bronse på 5 km og 20 km på Geilo
• Ski-NM 1990: Bronsemedalje på 30 km på Gjøvik
• Ski-NM 1991: Nr 7 på 30 km i Bodø
• Ski-NM 1992:
• Ski-NM 1993: Nr 4 på 15 km på Lillehammer
• Ski-NM 1994: Nr 9 på 30 km på Koppang

Kjelder

• Sportsboken, aktuelle årgangar

Bakgrunnsstoff

• «Marianne Dahlmo» (på engelsk). Olympedia. Henta 23. juni 2022.