Henry Hermansen

Henry Hermansen (13. april 1921–18. januar 1997) var ein norsk langrennsløpar og skiskyttar frå Lunner. Han vart noregsmeister i skiskyting i 1959, og vann to NM-bronsar i langrenn og ein i skiskyting. I 1950 fekk han VM-bronse i langrennsstafett for Noreg. Hermansen var busett i Oslo og representerte IL i BUL.

Henry Hermansen
Statsborgarskap	Noreg
Fødd	13. april 1921 Lunner kommune
Død	18. januar 1997 (75 år) Oslo
Yrke	skiskyttar, langrennsløpar

Aktiv

Hermansen var ankermann på Oslo Skikrets sitt stafettlag som vart noregsmeister både i 1950 og 1951. Han har to tredjeplassar på 17 km frå ski-NM i langrenn både i 1949 og 1951. Hermansen var med i Noregs tropp til VM på ski i Lake Placid i 1950. Der vart han nummer 15 på 18 km, og var ankermann på Noregs stafettlag som vann bronse.

Hermansen avslutta som skiskyttar. Han vann NM i skiskyting i 1959, og vart såleis den aller fyrste noregsmeister i skiskyting. Same sesongen deltok han i VM i Courmayeur og kom på 10. plass, same plasseringa fekk han også i vinter-OL 1960 i Squaw Valley. I sitt siste VM, i 1962 i finske Tavastehus, vart han nummer 14. Han tok same året bronsemedaljen under noregsmeisterskapen i skiskyting på Elverum.

Medaljar og besteplasseringar i noregsmeisterskap

• 1949: Bronsemedalje på 17 km langrenn på Steinkjer
• 1951: Bronsemedalje på 17 km langrenn i Narvik
• 1952: Nr 6 på 18 km langrenn i Porsgrunn
• 1959: Gullmedalje i skiskytingi Oslo
• 1962: Bronsemedalje i skiskyting på Elverum

Kjelder

• P.Chr. Andersen:Den nye olympiaboken. 1957
• Sportsboken, aktuelle årgangar

Bakgrunnsstoff

• Norges Skiskytterforbunds NM-statistikk Arkivert 2010-08-05 ved Wayback Machine.
• International Biathlon Unions resultatstatistikk
• (en) Henry Hermansen – Profil og resultatoversikt i olympiske konkurransar på sports-reference.com.