Sergej Kirov

Sergej Mironovitsj Kirov (27. mars 1886–1. desember 1934) var ein sovjetisk kommunistisk politikar. Han gjekk inn i det russiske arbeidarpartiet i 1904. Det er ikkje klart om han tok parti for bolsjevikane mot mensjevikane før etter revolusjonen. I åra fram til den russiske revolusjonen var han i fleire periodar arrestert for den politiske verksemda si.

Sergej Kirov
Statsborgarskap	Sovjetunionen
Fødd	15. mars 1886 Urzjum
Død	1. desember 1934 (48 år) St. Petersburg
Yrke	politikar
Språk	russisk
Politisk parti	Sovjetunionens kommunistiske parti, Det russiske sosialdemokratiske arbeidarpartiet
Medlem av	Politbyrået i Sovjetunionen, All-Union Society of Old Bolsheviks
Sergej Kirov på Commons

Etter revolusjonen deltok han i den russiske borgarkrigen. I 1921 vart han leiar for kommunistpartiet i Aserbajdsjan. I 1926 vart han leiar for partiet si avdeling i Leningrad, mellom anna for å få orden på partiavdelinga. I 1930 vart han medlem av politbyrået. I denne perioden markerte Kirov seg som ein sterk tilhengar av Stalin. Mange hevdar at Kirov begynte å markere usemje med Stalin sine til tider brutale metodar utover på trettitalet, men dette er ikkje dokumentert.

Kirov vart myrda i 1934, og omstenda rundt mordet har vore gjenstand for mykje spekulasjon. Dette sidan mordet danna grunnlaget for Moskvaprosessane. Stalin meinte at det dreia seg om ein trotskistisk konspirasjon. Kritikarar av Stalin og Sovjetunionen meinte på den andre sida at det var Stalin som stod bak fordi Kirov representerte ein trussel mot Stalin si makt. Denne teorien har blitt støtta også av Khrusjtsjov og Gorbatsjov. Opninga av dei sovjetiske arkiva har ikkje kunna gitt noko avklaring på saka. Den tidlegare sovjetiske etterretningsagenten Pavel Sudoplatov meiner at det rett og slett dreia seg om eit sjalusidrap som Stalin såg sitt snitt til å utnytte til sin fordel.

Kjelder

• Denne artikkelen bygger på «Sergej Kirov» frå Wikipedia på bokmål, den 27. desember 2008.