Rupi
From Wikipedia, the free encyclopedia
Rupi (eng. rupee) er ei mynteining som er eller har vore brukt i Sør-Asia og nærområda. I dag er rupi mynteining i India, Nepal, Pakistan og Sri Lanka. Ein bruker roupie på Mauritius og Seychellane, rupiah i Indonesia og rufiya på Maldivane. Ein brukte rupi i Afghanistan fram til 1927, på Zanzibar frå 1908 til 1935, i Burma mellom 1852 og 1952, og i Bhutan fram til 1974. Ein har også brukt rupi i sørlege Afrika, Arabia og i indiske koloniar.
![Thumb image](http://upload.wikimedia.org/wikipedia/commons/thumb/8/88/Silver_Rupee_Akbar.jpg/320px-Silver_Rupee_Akbar.jpg)
Rupien blei innført som ein mynt med standard vekt av afghanske Sher Shah Suri då han herska over India 1540-1545. Han blei kalla rupiya, eit namn avleidd av sanskrit rūpyakam, som tyder 'sølvmynt'. Sher Shah Suri sine rupiar av sølv vog 178 gran, i tillegg innførte han til koparmyntar kalla dam og gullmyntar kalla mohur. Myntsystemet blei seinare standardisert av mogulherskarane.
![Thumb image](http://upload.wikimedia.org/wikipedia/commons/thumb/7/70/Countries_using_the_Rupee.png/640px-Countries_using_the_Rupee.png)