Djevelen er ei nemning brukt om eit mektig overnaturleg vesen som står for det vonde i fleire religionar, særleg kristendommen og islam. Førestillinga er utvikla frå jødedommen, der ein Satan er ein engel som peiker ut folk sine vonde dragningar eller er ei kjelde til desse. Ordet «djevel» kjem frå gresk diabolos, som tyder 'skuldar' eller 'bakvaskar'. Det kom inn på norrønt som djafull, og kan som «djevel» visa til demonar eller vonde menneske. Ordet finst også i nokre faste uttrykk og som bannord. Vidare finst det ei rekkje tilnamn for Djevelen, som Fanden, Gamle-Erik, Hinmannen, mannen med hoven, Styggen, Tykje og Den vonde.
![Thumb](http://upload.wikimedia.org/wikipedia/commons/thumb/5/5c/Michael_Pacher_004.jpg/640px-Michael_Pacher_004.jpg)
![Thumb](http://upload.wikimedia.org/wikipedia/commons/thumb/b/b2/Fande_og_futen.jpg/640px-Fande_og_futen.jpg)
I Bibelen opptrer Djevelen i Første Mosebok som ein freistar som lokkar Eva til å eta av kunnskapstreet, i Jobs bok som ein som prøver Job, og i Matteusevangeliet igjen som ein freistar for Jesus. Djevelen er også kalla Satan og i nokre høve Lucifer, men det siste er omdiskutert. Han er ofte rekna som ein fallen engel.
I Koranen blei Djevelen og djinnane skapt av Gud, men valde å ikkje lyda han. Dei prøver å lokke og freista menneska til å synda. Djevelen er kjend som Iblis eller Shaitan i islam.
Djevelen har oppteke folk sterkt gjennom tidene, og han er blitt framstilt i biletkunst og litteratur. Tradisjonelt har ein sett han for seg som ein grotesk menneskeaktig skikkelse, ofte mørkleten, med dyrelemar som horn og hovar eller klauver. Nokre gonger kan han ha vengjer som ein engel, men desse er ofte mørke, motsett lyse eller kvite englevengjer. Djevelen kan visa seg for folk og kjøpslå med dei, som regel ved å gje dei gåver i bytte mot sjela deira. Mange folkeeventyr handlar om korleis ein lurer Djevelen. Ein finn også Djevelen som hovud- eller biperson i ei rekkje nyare bøker og filmar.
Kjelder
- Denne artikkelen bygger på «Djevelen» frå Wikipedia på bokmål, og «The Devil» frå Wikipedia på engelsk den 18. januar 2009.
Bakgrunnsstoff
- Ronald Grambo: Djevelens livshistorie. Scener fra en travel tilværelse. Oslo 1990. Ex Libris. ISBN 82-7384-252-5.
- Oppslagsordet «Djævel» i Salmonsens konversationsleksikon fra 1915-1930 (på dansk)
- Oppslagsdordet «Djævel» i Ordbog over det danske sprog (på dansk)
- Oppslagsordet «Djävful» i Svenska Akademins ordbog (på svensk)
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.