मुरासाकि शिकिबु

मुरासाकि शिकिबु (紫式部, ' लेडी मुरासाकि' ; करिब ९७३ – करिब १०१४ वा १०२५) छम्ह जापानी उपन्यासकार, चिनाखँमि व हेइयान कालया शाही दरबारय् लेडी -इन-वेटिङ ख । वय्कःयात वय्कःया उपन्यास द टेल अफ गेन्जीया निंतिं म्हसीकिगु या। थ्व उपन्यासयात हलिमया न्हापांगु उपन्यासय् छगूया कथं कायेगु या। थ्व उपन्यास करिब १००० व १०१२ दथुइ जापानी भासं च्वयातःगु दु। मुरासाकी शिकिबु छगू वर्णनात्मक नां ख; वय्कःया व्यक्तिगत नां वर्तमानय् मस्यू, तर वय्कः फुजिवारा नो काओरिको (藤原香子) जुइफु, सुयात १००७या जापानी लाय्कूया दस्ताबेजय् शाही लेडी-इन-वेटिङया रुपय् न्ह्यथनातःगु दु।

मुरासाकि शिकिबु

हेइयान मिसात परम्परागत रुपं चिनियाँ सयेके मबीगु चलन दयाच्वन। हेइयान कालय् सरकारया च्वयेगु भाय् चिनियाँ भाय् जुयाच्वन। तर, मुरासाकीं मचाबिले निसें वय्कःया थःछेँय् चिनियाँ ग्रन्थया निंतिं छगू लगाव क्यनादिल। वय्कलं थःगु २० दँया मध्यनिसें लिपांगु इलय् इहिपा यानादिल व वय्कःया म्ह्याय् दैनी नो सानमी बुइकादिल। इहिपाः जूगु निदँ लिपा वय्कःया भाःत मदुगु खः। वय्कलं द टेल अफ गेन्जी गबले च्वयेगु शुरु यानादिल धइगु अनिश्चित दु , तर सम्भवतः वय्कःया इहिपा जूगु इलय् वा वय्कः विधवा जुइधुंकाः छुं ई लिपा हे च्वयादीगु खः। करिब १००५इ वय्कःयात फुजिवारा नो मिचिनागां इम्पेरियल दरबारय् सम्राज्ञी शोशीया लेडी-इन-वेटिङया रुपय् ज्या यायेत सःतल, सम्भवतः वय्कःया च्वमिया रुपय् प्रतिष्ठाया कारणं थथे जूगु खः। वय्कलं थःगु सेवाया झ्वलय् नं च्वयादिल, दरबारी जीवनया दृश्यत थःगु ज्याय् तनादिल। करिब न्यादँ निसें खुदँ लिपा दरबार त्वःताः शोशीलिसे बिवा ताल क्षेत्रय् अवकाश कायादिल। वय्कःया मृत्युया दँय् विद्वानतेगु मतभेद दु; अप्वः थें विज्ञ १०१४ स सहमत जूसां, मेपिन्सं व १०२५स वय्कः म्वानाच्वंगु सुझाव ब्यूगु दु।

मुरासाकीं "द डायरी अफ लेडी मुरासाकी" काव्यया छगू खण्ड, नापं द टेल अफ गेन्जी च्वयादिल। थ्व च्वज्या क्वचाःगु छगू दशकया दुने हे गेन्जीयात प्रान्त-प्रान्तय् वितरण यात; छगू शताब्दीया दुने थ्व जापानी साहित्यया क्लासिकया रुपय् मान्यता प्राप्त जुल व विद्वानतेगु समालोचनाया विषय जुल । सन् १९२५ निसें १९३३ या दथुइ द टेल अफ गेन्जी अंग्रेजी भासं पिदंगु खः। विद्वानतय्सं वय्कःया ज्याया महत्वयात निरन्तर रुपं मान्यता बियाच्वंगु दु, गुकिं हेइयान दरबारी समाजयात चरम अवस्थाय् क्यनाच्वंगु दु । १३गु शताब्दी निसें वय्कःया कृतिइ जापानी कलाकार व नांजाःपिं उकियो-ए वुडब्लक गुरुतेसं चित्रण यानातःगु दु।

स्वयादिसँ

• उपन्यास
• जापान