माइक्रोबायोलोजी
From Wikipedia, the free encyclopedia
माइक्रोबायोलोजी वा सूक्ष्मजैविकी मिखां साधारणकथं मखनिगु सूक्ष्मजीवतयेगु अध्ययन यायेगु शास्त्र ख। थ्व शास्त्रय् छगू कोशिकीय वा सूक्ष्मदर्शीय कोशिका-समूह प्राणीतयेगु सीकेज्या जुइ।[1] थ्व शास्त्रय् युकेर्योट दसु कवक व प्रोटिस्टा, व प्रोकेर्योट, दसु ब्याक्टेरिया व आर्किया आदिया सीकेज्या जुइ। भाइरसतयेत स्थायी जीव वा प्राणी मधासां थ्व शास्त्रया अन्तर्गतय् इमिगु नं सीकेज्या जुइ।[2] संक्षेपय् सूक्ष्मजैविकी थन्याःगु सजीवतयेगु सीकेज्या ख गुकियात नांगा मिखां खने फैमखु। सूक्ष्मजैविकी छगू तःधंगु ख्यः ख। थ्व ख्यले भाइरोलोजी, कवक विज्ञान, परजीवी विज्ञान, ब्याक्टेरिया विज्ञान, व यक्व मेमेगु शाखा दु। सूक्ष्मजैविकीइ तत्पर मालेज्या जुयाच्वनि व थ्व ख्यः अनवरत प्रगतिइ अग्रसर दु। आ तक्क मनुतयेसं हलिमया सकल सूक्ष्मजीवय् छगू प्रतिशतया अध्ययन याःगु जुइमा।[3] सूक्ष्मजीव थ्यंमथ्यं स्वसः दँ न्ह्यःनिसें खंगु जुसां जीवविज्ञानया मेमेगु ख्यः दसु पशु विज्ञान वा पादप विज्ञानया अपेक्षाय् सूक्ष्मजैविकी थःगु अति प्रारम्भिक स्तरय् दयाच्वंगु दु।