मगध
From Wikipedia, the free encyclopedia
मगध बुद्धकालीन १६गु आर्य महाजनपदया छ्गू जनपद ख। थ्व जनपदया मू क्षेत्र गङ्गा स्वया दक्षिणया बिहारया क्षेत्र ख। थ्व जनपदया राजधानी न्हापा राजगृह (वर्तमान राजगीर) व लिपा पाटलिपुत्र (वर्तमान पटना) जुवन। मगधं लिच्छवि व अङ्ग राज्य अधिग्रहन याना वर्तमान बिहार व बङ्गालया अधिकांश भूभाग थःगु अधीनय् लाकूगु खनेदु। [1] थ्व धुंका मगधं वर्तमान पूर्वी उत्तरप्रदेश व उडिसायात थःगु अधीनय् लाकूगु खनेदु। प्राचीन मगधया उल्लेख रामायण, महाभारत, पुराण आदिइ जूगु खनेदु। थ्व जनपदया उल्लेख बौद्ध व जैन ग्रन्थ व स्तोत्रय् नं यक्व हे जूगु खनेदु।
मगधया दकले पुलांगु वर्णन अर्थववेदय् जूगु खनेदु। थन थ्व थाय्यात अङ्ग, गान्धार, व मुजावत नापं उल्लेख याःगु खनेदु। भारतया निगु मू धर्म बुद्ध धर्म व जैन धर्मया विकास मगधय् जूगु खनेदु धाःसा भारतया निगु मू साम्राज्य मौर्य साम्राज्य व गुप्त साम्राज्य नं मगधं हे वःगु खनेदु। थ्व निगु साम्राज्यया कालय् प्राचीन भारतया विज्ञान, गणित, ज्योतिष, धर्म, दर्शन आदिया यक्व विकास जूगु खनेदु। अतः, थ्व कालयात भारतया सुवर्णकाल नं धायेगु या। मगध राज्यय् गणतान्त्रिक समुदाय दसु राजकुमार व गां-गाम्य् थः-थःगु हे ग्रामक प्रमुख सहितया पञ्चायत दूगु खनेदु। राज्य संरचना प्रशासन, न्याय व सैन्य ज्याय् विभक्त जूगु खनेदु।