डाउन सिन्ड्रम
From Wikipedia, the free encyclopedia
डाउन सिन्ड्रम वा ट्राइजोमी २१ (डाउनयागु सिन्ड्रम) छगू जेनेटिक डिस्अर्डर खः । थ्व ल्वय् २१ औं क्रोमोजमयागु पूर्ण वा आंशिक रुपं मात्रा अप्वः जुया जुइगु खः। थ्व ल्वय्या नां छम्ह बेलायती चिकित्सक जोह्न ल्यांग्डन डाउनया नामं वःगु खः । वय्कलं थ्व ल्वय्या वर्णन १८६६ स यानादीगु खः । थ्व अवस्थाया लक्षण झीगु म्हया अंगय् साधारण स्वयां अप्वः वा म्हो भिन्नता दया वइगु खः । अक्सर डाउन सिन्ड्रमय् कग्निटिभ क्षमता व भौतिक विकासयागु नापं ख्वाःया चहःपहलय्् नं कमी खनेदइ । थ्व ल्वय् अप्वः याना मचा बुइबललय् हे सिइदइ।
डाउन सिन्ड्रम दुम्ह मचानं एलेक्ट्रिक ड्रिल छ्यलाच्वंगु | |
ICD-10 | Q90. |
---|---|
ICD-9 | 758.0 |
OMIM | १९०६८५ |
DiseasesDB | ३८९८ |
मेडलाइन प्लस | ०००९९७ |
ईमेडिसिन | ped/६१५ |
डाउन सिन्ड्रोम दुपिं मनुतय् औसत स्वया म्हो कग्निटिभ क्षमता (हल्कानिसें मध्यम सुस्त मनस्थिति) दयेफु । वैकासिक अक्षमता अप्वः याना नाइभिटीयागु रुपय् खने दइ । थ्व ल्वय् दुपिनिं मध्यय् सुयातं सुयातं अत्याधिक वा प्रोफाउन्ड सुस्त मनस्थिति खनेदइ । न्हूबूपिं मस्तयेके थ्व ल्वय् च्यास (८००) लय् छम्ह वा द्वःछि (१०००) इ छम्हसित खनेदइ ।
थ्व ल्वचय् यक्व शारीरिक लक्षण साधारण क्रोमोजम दुगु मनू तयेके नं खनेदइ । थज्यागु लक्षणत थु कथं दु - छपा वा निपां ल्हातय् निगुया थासय् छगु जक्क ट्रान्स्भर्स पामर रेखा: दइ, मिखा धकिंयागु इपिक्यान्थिक फोल्डं याना मर्स्या बरां थें न्याग: मिखा दइ, चीहाकगु तुति दइ, व पिहां वयाच्वंगु (protruding) मे दइ । उसाय् कथं स्वय् बले थ्व ल्वय् दुपिं मनू तयेत कन्जेनाइटल नुग: ल्वय्, ग्यास्ट्रोइसोफेजियल रिफ्लक्स ल्वय्, रिकरेन्ट न्ह्याय्पंयागु संक्रमण, अब्स्ट्रक्टिभ स्लिप अप्निया व थाइरोइया ल्वय् जुइगु सम्भावना अप्व: दइ ।
बाल्यकालय् न्हापां इन्टरभेन्सन, सामान्य ल्वय्या निंतिं स्क्रिनिंग, मालीबले चिकित्सां लंकिगु, बांलागु पारिवारिक वातावरण व भोकेसनल् ट्रेनिंग नं डाउन सिन्ड्रम दुम्ह मचाया विकासय् ग्वाहालि याइ । थ्व ल्वय्या छुं जेनेटिक अक्षमतायात लंके मफुसां शिक्षा व उचित स्याहारं मचायागु जीवनस्तर थकायेत ग्वाहालि याइ । [1]