From Wikipedia, the free encyclopedia
Wielrennen is nen sport woerbie as leu met ne fietse zo hard of wied meugelik fietsen doot. Hiervuur broekt ze spesiale fietsen, met een dun, lecht frame en dunne beandkes, um zo min meugelik locht- en wegwierstaand te hebben. De meeste leu doot wielrennen vuur de wille, mer et gef ook wedstrieden en hele wearldkampioenskoppen. Topwielrenners köant op zin härdst roond de 60 km/u fietsen. Van den bult of keump de snelhead mangs boawen de 120 km/u.
Meesttieds wörd met et woard wielrennen et wegwielrennen bedoold. Aandere soorten wielrennen zeent baanwielrennen, BMX en mountainbike. Wielrennen kö'j allene doon of met nen groep. Der zeent ook wielrenvereniges, dee as zik meestal op ene van de twee wielerstreumingen richtet: toeren of wedstrieden. Toerklubs goat regelmoatig lange tochten fietsen. Wedstriedvereniges doot vuural trainen op (amateur)wedstrieden.
De sport wörd wearldwied ansteurd en regeld duur de Internasjonale Wielerunie, de UCI.
Wellicht de bekeandste wielrenwedstried is de Roonde van Fraankriek. Ne tweede bekeande wedstried is de Giro d'Italia (de Roonde van Italië). Mer ook de wearldkampioenskoppen trekt aait völle andacht. Doarnöast zeent der in Europa een antal wedstrieden oawer ne vaste roonde (mangs in nen binnenstad of duur ne proveensie of laandstrekke). Dit wordt klassiekers eneumd. Bekeande klassiekers zeent Luik-Bastenaken-Luik, de Amstel Gold Race, Paries-Roubaix en Milaan-San Remo. Doarnöast gef et zowat in elke gemeente in Nederlaand wal ne lokale wielerroonde, dee as vuural vuur promosie van bedriewe en de sport geeldt.
De lieste hieroonder löt willekurig een antal bekeande fietsers zeen: