Oaverdeenkel

Oaverdeenkel (Nederlaands: Overdinkel) is n doarp in t zuud-oostn van Tweante teegn de Duutse greanze, in de gemeente van Losker. t Ligt an de Deenkel en hef ongevear 3760 inwonners.

Roomske Koarke Oaverdinkel

Protestaantse Koarke Oaverdinkel

Geskiedenisse töt 1890

Op t dreeleandepeunt van Nedersaksen, Westfalen en Tweante ligt Oaverdeenkel. t Is umgeewn duur heed en bos. Teegn de greanze an lear t Tieknvenne met nen plas den at vol egröaid was met reet, en den at in latere joarn dreuge is elegd. Kort oawer de greanze lear n groot zaandgebeed. An de Ruhenbergerbekke, den at Neerlaand binn keump, lignt n antal boernoarvn: Welpelo, Beernink, Luijerink en Nijland.

An de aandere kaante, woer at n Deenkel löp, he'j oonder mear de oarven Roterink, Lakerink, Elferink en Ter Denge. Disse oarven wordt al eneumd in t Moarkebook van Losker in 1533, woerin al edoan wörd van Oaverdeenkelse boern. Um 1200 steet n naamn Oaverdeenkel of Oaverdeenkelseveald al in de beuke. t Was n verdichte noaberskop, net as op zovölle plaatsn in Tweante.

In Oaverdeenkel löp de Invalsweg. Den wörd zo eneumd umdet in t vuurjoar van 1672 Bernhard van Galen, Bisskop van Meunster (Bomnbearnd) met n leager Oaweriessel binn treuk, woerbie at ze oonderwiel Oaverdeenkel en Losker löagreuwdn. Ze zatn kaamp op op de kruusing Invalsweg-Welpeloweg, woer at t machtig oolde veeldkruus van oawerdeenkel steet. Hier is nog n busken, en wörd alle joarn nog t Skuttersfeest eheuldn.

Geskiedenisse noa 1890

Noa 1890 wördn in Gronau textielfabriekn ebouwd. Pastoor Roberink van Steenwiekerwoold, den at in Losker geboorn was, spoerdn völle leu oet n Kop van Oaweriessel an um noar Oaverdeenkel te goan, umdet doar woark was en zinne parochiaann in oarmood leawdn. Freeskn en Dreantn kreegn dr ook locht van en kömn ook met.

In 1907 har Oaverdeenkel al 1600 inwonners, en wör van ne kleaine noaberskop n kleain doarp. In detzelfde joar wör dr ne roomske koarke ebouwd. Twee joar later, in 1909 wör vuur de protestaantse immigraantn ne Protestaantse koarke ebouwd.

Bekeande inwonners

• Gert Timmerman (oold-muzikaant)
• Fred Rutten (oold-trainer van FC Twente en Schalke '04, PSV, rechtevoort van Feyenoord)