N Oosterhof (Riessen)

Havezate n Oosterhof is n kasteel in Riesn, in Tweante. t Wörd vuur t eerst eneumd op ne verkoopakte oet 1334 as Schultengoed Gerlovic van Johan van Thije. Zo t kasteel dr non oetzut is vuur n groot deel te daankn an ne verbouwing oet t 18e joarhoonderd.

n Oosterhof

Geskiedenisse

In 1475 wörd t ekocht duur t geslacht Van Langen, det an n eande köm in 1637. In dissen tied kreeg t kasteel mear bekeandheaid umdet Prins Maurits dr völle köm um op jacht te goan. In 1637 wör kollenel van de Stoaten van Oaveriessel Ernst van Ittersum oarfgenaam van n Oosterhof en t bleef in de femilie töt 1900. n Lesten oet disse liene, Frederik Alexander van Ittersum, den't n Oosterhof oarvn in 1848, köm oet de tied op 21 oktober 1900. Toew gung alns oawer op zin zuster Louise, den't etrouwd was met Jonkheer Hendrikus A.D. Coenen. Töt 1959 bleef t in de femilie. Teegn dee tied was de havezate al zo of etakeld det dr nog nauweliks in ewoond kon wordn. In 1960 verkochn n lestn bewonner, Barones van der Borch tot Verwolde, t hoes en alle groond an de gemeente Riesn,^[1] woernoa't t hele spulken wier op elapt wör.

Doarnoa wör t töt an 1987 gebroekt as opleaidingsgebouw vuur kroamvrouwleu. Doarnoa wör t oawer edreagn noar de spesjaal doarvuur op erichte Stichting Havezate Oosterhof.

Gebroek

t Grötste deel van n Oosterhof wörd non gebroekt duur t Riessens Museum. n Aander gedeelte wörd gebroekt duur de Kreenk Woarkgewers van Riesn.

In t rechter bouwhoes zit n arzietektnkantoor, en in t leenker bouwhoes zit seend 2002 t Internasjonaal Brandwearmuseum, en n deel van de verzameling van t Riessens Museum.

Binn de singels van n Oosterhof is nen grootn hof an elegd, den't duur de Gemeente wörd oonderhooldn. Dissen hof is lös vuur iederene, en is ne geleefde stean vuur trouwfotoos.

Bronnen / wellen:

http://www.rijssensmuseum.nl/sub/oosterhof.html Stukn op de webstea van t Riessens Museum http://www.kasteleninoverijssel.nl/pages/oosterhof.htm