Museum Palthehof

't Museum Palthehof is een museum in 't Oaveriesselse dörp Ni'jlusen, daor a'j kunt leren oaver de geschiedenis van dizze plaatse. 't Museum is in 1998 opend deur de Historische Vereniging "Ni'jluusn van vrogger". De verieniging 'ef sinds de oprichting in 1982 hiel wat olde spullen eschunken ekregen, die as now in 't museum te bezichtigen bint.

't Museum Palthehof op Ni'jlusen.

't Museum is enuumd naor de femilie Palthe, die töt 1928 laandbezitters op Ni'jlusen waren. 't Stiet veur 't an de zuudkaante van 't dörp elegen Palthebos, vrogger bezit van dizze femilie.

In 't museum vien ie de inventarissen van allerhaand ambachteleke bedriefies, boerengerak, huusholdeleke veurwarpen en kleraosie. D'r is een grote verzaomeling spullen van de op Den Hulst op-erichte fietsenfebriek Union. D'r bint een schoelklassien, een boerenkeuken en een 'mooie kamer' in-ericht. Ok bint er onder aandere maquettes te bekieken van een Ni'jluseger boerderi'je, van de veurmaolige havezate Oosterveen en van een schip det vrogger mit törf deur de Dedemsvaort gunk.

Naost de vaste tentoonstellings hef 't museum alle jaoren een aandere lösse tentoonstelling. D'r bint wisseltentoonstellings ewest oaver schoelspullen, de Union, marklappen en letterdoeken, olde en ni'je blikken en trommels, en nog zo wat onderwarpen.

• 
  Tiedschrift van de Historische Vereniging "Ni'jluusn van vrogger"

Buten dizze webstee

• De webstee van 't Museum Palthehof

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.