Kopenhoaven

Kopenhoaven (Deens: København) is de heufdstad van Denmaark. Kopenhoaven ligt aan de oostkost van t aailaand Seelaand en op t aailaand Amager. De stad zölven het oetzicht op de stad Malmö dij ien Sveden ligt. De gemainte Kopenhoaven het 509.861 ienwoners en is doarmit de grootste stad van Denmaark. Ien de haile metropool van Kopenhoaven wonen 1.153.615 mìnsken (2008).

Satellietfoto van Kopenhoaven

t Stadhoes van Kopenhoaven

Nijhoaven

Binnenstad

De mainste monumentoale gebaauwen ien Kopenhoaven stammen oet de 17e aive. t Sentrum van Kopenhoaven is roem opzet.

Boetenwieken

De boetenwieken van Kopenhoaven binnen opzet om de woningsnood op te lössen. Dizze wieken binnen Nørrebro (Noorderbrogge), Østerbro (Oosterbrogge) en Vesterbro (Westerbrogge). Vesterbro is benoam bekìnd om zien amusamentspaark Tivoli. Østerbro staait bekìnd as n stoatege wiek woar mìnsken mit kinder wonen en de leste van de drij Nørrebro staait benoam bekìnd as n volkswiek woar veul mìnsken mit verschaaiden nasjonaliteiten wonen. De twij wieken Vesterbro en Nørrebro binnen de leste joaren nuver vernijd, woarbie Nørrebro ain van de mainst hippe oetgoanswieken worden is. Østerbro wor as schierste van de drij broggewieken zain.

Deur t gruien van de stad is de olde stad Frederiksborg (Frederiksbörg) hailendaal deur Kopenhoaven omsloten. Frederiksbörg ligt west van Kopenhoaven mor wor deur Nørrebro en Vesterbro hailendaal iensloten en is doardeur n soort van aailaand ploatske binnen de gruppe van regio Hovedstaden (de heufdstad) worden. Frederiksbörg is nog aaltied gain dail van de gemainte Kopenhoaven en het zien aigen bestuur en stadhoes.

Biezunderheden

Strøget is Kopenhoavens belangriekste winkelstroate. Ien dizze stroate binnen befoamde nasjonoale produkten te kriegen en ok binnen der veul ienternasjonoale winkels. De winkelstroate begunt faitlieks bie t Rådhus (Roadhoes), mor van Nytorv (Nijplaain) òf begunt de echte winkelstroate dij deurlopt tot Kongens Nytorv. Bie Kongens Nytorv ligt t keunenkleke theoater.

Ien de hoaven staait t befoamde beeld t Lutje Zeewiefke. Dit lutje beeld is inspireert op t waark van de Deense schriever Hans Christian Andersen. t Beeld van t Lutje Zeewiefke is nait de ainegste attraktie dij Kopenhoaven het. Ien de stad vindt man ok beelden noast de openboare weg en ien paarken. De stad het veul musea.

Nyhavn (Nijhoaven) is noa t Lutje Zeewiefke n grote toeristische trekplaaister. Hoezen dij te zain binnen bie de Nijhoaven binnen ien verschaaiden kleuren vaarfd. Dizze speulse menaaier van presentoatsie mokt de Nijhoaven veur toeristen doarom ok hail populair. Ien de zummer is t bie Nyhavn slim drók. Goud is te zain dat toeristen der din geern kommen. Ien ain van de hoezen ien Nyhavn het Christian Andersen nog wonen doan. Nait allinneg de hoezen mokt Nyhavn n schier stee veur toeristen. Ok tal van krougen en eetplakken binnen op n lutje òfstand bie nkander en makkelk veur elkenaine beriekboar.

Dit artikel is skreaven in et grönningsk.