Hunebed

n Hunebed is n stainen grafkoamer dai bestaait uut grode stoande stainen (zwaarfvlints) overdekt deur huile grode, platte stainen. Mit klaindere stainen is voak, môr nait aaltied, aan n ziedkaant n ingaang môkt. t Gehuil wuir overdekt mit eerde zodat der n flinke hoogte ontstond. Zai wuiren baauwt in de prehistorie. Man vond ook voak prehistorische veurwaarpen onder de stainen.

t Grootste hunebed van Nederlaand, bie Börger

Onderzuik noar en op hunebedden wuir pas doan in de twaide hèlfte van de 19e aiw deur professor A. van Griffen uut t Grunnegse Noordhorn. Bie dit onderzuik wuiren aal Nederlaandse hunebedden nummerd. Zo binnen der in de provìnzie Drìnthe 52 hunebedden dai lopen van D1 tot D52 tou en in de provìnzie Grunnen binnen der twai dai lopen van G1 tot G5 tou. De aander drai binnen deur de aiwen hìn huilmoal vot kommen. Man docht aaltied dat F1 ook bestond, n Hunebed in t Fraise Goasterlaand, môr noa onderzuik bleek dat dit gain Hunebed was môr n zonuimde stainkist.

Woapen van laandkraits Emslaand

In t Duutslaand over de grènze bie Drenthe en Grunnen stoan ook hunebedden. Dit is ook te zain aan t woapen van t laandkraits Emslaand. Sommege Duutse hunebedden binnen zulfs groter as de Drìntse.

Bie Börger staait t grootste hunebed van Nederlaand en de stoan ook de maiste bie mekoar: 13. In Börger is ook t hunebeddenzèntrum vestegd.

Hìnwiezen

• t Offisjele hunebedzèntrum in Börger
• n Uutvoereg overzicht mit fotos en beschrievens van alle Nederlaandse hunebedden

Schreven in t Veenkelonioals