From Wikipedia, the free encyclopedia
Neferneferuaten Nefertiti of simpel Nefertiti was t wief van farao Akhenaten, de ketter, en schoonmouder van Toetankhamon. Mit Akhenaten har zai 6 dochters: Meritaten, Maketaten, Ankhesenpaaten, Nefer-Neferu-Aton, Nefer-Neferu-Re und Setepenre. Over de heerkomst van Nefertiti is weineg bekend. Veul egyptologen mainen dat zai femilie was van Aye en vanoet de Hoarem van Akhenaten hoald is en zo in kontakt mit Akhenaten kwam.
Nefertiti staait bekend as de schierste vraauw van Egypte. Gain wonder dat heur noam betaikent de schiere is kommen. Noastdat zai der schier oet zag, was zai ook nog ais hail machteg wèst worden. Oet onderzuik bleek dat zai de vraauw achter Akhenaten was. Akhenaten deed alles, zo laank Nefertiti t der mit ais was.
Rond de helft van zien regeernsperiode verdween Nefertiti oet de geschriften. n Meugelke verkloarn hierveur is dat zai t der tou deed deur de pestploag van dat moment.
Doch het Joann Fletcher, de archeologe dij t meugelke lichoam van Nefertiti vonden het, n andere theorie. Op t moment dat Nefertiti verdween oet de geschriften, verscheen der n ander figuur dat Semenkhare Ankhepreroere nuimd wordt. Dizze Semenkhare wuir de mede-regent van Akhenaten en regeerde Zuudegypte, in tieds dat Akhenaten Noordegypte regeerde. Joann Fletcher maint dat Semenkhare en Nefertiti ain en dezölfde persoon binnen.
Dou t liek van Nefertiti vonden wuir, lag zai in dezölfde holden as n farao. Ook har heur haand de positsie van t vastholden van n scepter. Dit wiest erop dat Nefertiti farao wèst het. Doarnoast was zai begroaven in t Dal van de Keunengen. Dit verwiest ernoar dat Nefertiti farao wèst het, moar ook dat zai Semenkare west zoll hebben mouten. Den der is gain andere periode dat Nefertiti de kaans har om farao te wezen dan in dezölfde periode dat Semenkhare farao was. Semenkhare regeerde noa de dood van Akhenaten nog n aantel joarn wieder, woarnoa ook zai oet de geschriften verswint.
Zahi Hawass is t anders nait mit dizze theorie ais. Hai maint dat der nait genog bewies is dat t liek dat Fletcher vonden het, ook doadwaarkelk dat van Nefertiti is. Hai beweert zölfs dat de mummie wel ais mannelk wezen ken. Ook beweern summege egyptologen dat Semenkhare n man was.
Welke theorie nau de juuste is, is nait zeker. Wel is zeker dat heur schierhaid is veur aait vaastlegd in de buste van Toetmozes dij tegenswoordeg in t Oldhaidsmuseum van Berlien staait.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
