اسپیلبرگ سینسیناتی ِشهر، اوهایو ایالت دله، دنیا بمو ولی فینیکس، آریزونا دله گت بیّه.[19] وه ای بورده کالیفورنیا و فیلمِ کالج دله درس بخونسته. چنتا اپیزود ره نایت گالری و کولومبو سریالون دله کارگردانی هاکرده په، بورده شه دوئل فیلم (۱۹۷۱) ره بساته که اول تلویزیون دله نمایش هدانه و انده خار بییه که سینمائون هم وه ره پخش هاکردنه. ونه اولین حرفهای فیلم که سینمائون وسّه بساته، دِ شوگرلند اکسپرس (۱۹۷۴) بییه. ات سال دمبالته، وه جوز (جَهودون) فیلم ره بساته که پرفروشترین فیلم بیّه و اینتی اسپیلبرگ اسم درهاکرده. ونه موفقیت ادامه داشته و کلوز انکانترز فرام ثایرد کایند (برخورد نزدیک نوع سوم، ۱۹۷۷)، ای.تی. (۱۹۸۲)، و ایندیانا جونز سهگانه (۱۹۸۱–۸۹) وه ره شهرت هدانه. ونه درام فیلمون سالهای بعد هم ادامه داشتنه و دِ کالر پرپل (۱۹۸۵) و امپایر آو سان (۱۹۸۷) ره هم بساته.
سال ۱۹۹۳ وه جوراسیک پارک فیلم ره علمی-تخیلی ژانر جه بساته که خله اسم درهاکرده و پرفروشترین فیلمی بیّه که تا اون گدر بسات بینه. ونه اتی فیلم شیندلر لیست بییه که هولوکاست خَوِری هسته و هنتا تاریخِ بتترین فیلمهای رج دله باقی هسته و اسپیلبرگ این فیلمِ کارگردانی وسّه شه اولین اوسکار ره بیته. وه اای جهونی جنگ دوم خَوِری فیلم بساته و اینتی ۱۹۹۸ سال دله سیوینگ پریویت رایان (نجات سرباز رایان) فیلم جه دومین اوسکار ره هم بدست بیارده. وه اون سال په، علمی-تخیلی ژانر دله ای.آی. آرتیفیکشال اینتجلنس (۲۰۰۱)، مینورتی ریپورت (۲۰۰۲) و وار آو د ورلدز (۲۰۰۵) ره بساته؛ ماجراجویی ژانر جه دِ ادونشرز آف تنتن (تنتن ِماجرائون، ۲۰۱۱) و ریدی پلیر وان (۲۰۱۸) ره کارگردانی هاکرده؛ تاریخی-درام ژانر جه آمیستاد (۱۹۹۷)، مونیخ (۲۰۰۵)، وار هؤرس (۲۰۱۱)، لینکلن (۲۰۱۲)، بریج آف اسپایس (جاسوسهایِ پل، ۲۰۱۵) و دِ پُست (۲۰۱۷) ره داشته؛ موزیکال جه هم وست ساید استوری (۲۰۲۱) و نیمچه اتوبیوگرافی جه دِ فابلمنز (۲۰۲۲) ره بساته.