Ривезь ды вергиз
From Wikipedia, the free encyclopedia
Ривезь ды вергиз
Ёвкске
Эрясть-аштесть атят-бабат. Весть атясь мери:
- Панть, баба, прякат, а мон ардан лей чирес, калс.
Кильдизе атясь лишменть нурдс, сайсь мезе тензэ эряви ды тусь калонь ульмамо.
Ульмась сон калтнэде пешксе нурдо ды уски кудоёнов. Арды атясь вирьга ды неи:
Килангсо ривезь валяи. Кирнявтсь атясь нурдсто, чийсь ривезенть малас, ривезесь лык а теи, уды апак стыля, теке кулось.
"Паро, карми бабантень вадря сивекс",
- арсезевсь сыресь ды ёртызе ривезенть нурдс. Сонсь лишменть панст ведьмеде ветямо кармась.
Ривезесь тавадовксонть кал лангсто каизе ды калонь ёртлеме вейкень- вейкень кармась.
Истя, вейкень-вейке, калтнэнь ёртлинзе весе, тосо сонськак нурдсто кирнявтсь. Атясь мееяк эзь нееяк. Совась кудов ды мери:
- Азёка, баба, кардаз икелев, мон тосо тонеть сивеяк, калткак ускинь...
Бабась чиезь сейсь кудосто орта икелев, неинзе чавот нурдтнэнь:
- Косо тонь калтнэ ды сивесь ?
- Ды, тосо! Нурдсот.
- Арась тесэ мезеяк!..
Лиссь атясь ушов, сась нурдтнэнь ваксс, ваны: сынь чавот.
- Лиси ривезесь манимим, - чарькодьсь атясь ды ёвлизе все бабантень, кода кудов самсто муизе сон куло ривезенть.
Жаль марявсть атянтень-бабантень ривезесь кал марто, ды мезеяк а теят.
Маньчиця ривезькесь пурнынзе калтнэнь каль ало, озась ды ярсы. Тесэ ваксканзо вергиз чии.
- Шумбрачи, ривезькай!...
- Шумбрачи, вергизке!
- Мезде тон ярсат ?
- Калдо...
- Монень максат, ярсамом сась.
- Азе ульмак ды ярсак.
- Мон а маштан.
- Те тевентень ламо превть а эрявить: чик лейс, нолдык пулот ведьс ды учок:
Калось сонсь пулозот понгавтневи; ансяк учок седе кувать...
Чийсь вергизэсь лейс. Мусь, косо велень ломантне эенть чупонизь, ды тейсть тосо анксема,пулонзо нолдызе ведентень ды учи.
Истя озадо кувать аштесь, кода валдомгадомо кармась, вергизэсь састынестэ кармась стямо ды пулонзо анксемастонть таргамо.
Ды а стяви кодаяк: пулозо эйс кельмесь! Варштась пертьпельга, неи - лей чиреванть ават парька-курся марто ведьс молить.
Арсезевсь превей вергизесь вирев менемс, ды пулось эйсэнзэ а нолды. Аватне, кода неизь, вергизэнть пулозо эйс кельмесь, пельме эзть карма, ваксозонзо састь. Ды кие кода машты, кармасть вергизэнть чавмо, кие ведрасо, кие курсясо. Вергизесь тей-тов кирнявли, ды пулозо а нолды. Истя пек кирнявлесь, пулось – сезевсь! Кода кирнявты вергезэсь чийме вирьёнов, ансяк аватне неемензэ кенерсть.
Ривезесь те шкастонть калтнэнь сэвинзе, ды симемазо сась. Сейсь сон веле малав, васенце кудонтень совась. Ёвкстызе прязо чапакс парьс, прязо чапакссо парстине ваднизе, ансяк кармась лия парьс прянзо тонгомо, ды тесэ азоркась совась. Ривезесь кирнявтсь ды кудосто вирь ёнов чийме. Чии ривезесь вирьга, неи, икелензе вергизэсь пуловтомо.
- Ват, тон косат,маницям, понгить!!! Ванат, кода монь порксымизь, верьс! Тонь трокс пуловтомо кадовинь!
- Тонь, вечкевикс ялга, верьс равтыдизь, а монь прям порксызь,
Весе удемень ливтясть, - ды невтизе вергизэнтень чапаксов прязно.
Вергизэсь кемизе ривезенть, ды мери:
- Вечкевикс ялга, тонеть седе ламо понгсь.
- Истя понгсь, пильгеньгак а кандовить...
- Сестэ мон тонь, ялгай, кандтан…
- Кандымик...
Озась ривезесь вергизенть копорес, ды арды лангсонзо.
Сонсь морот морси:
- Чаво пря вергизэсь, превей ривезьке уски, копоресэнзэ канды...
- Мее тон, ялгай, тосо морат?
- Ват, авардян,ды ранган, равтозесь седе пек равтозенть канды...
- Истя, ривезьке ялгай, истя....
Эрзякс ёвлизе Терюшань Серьгу
Лездась ды витнесь валтнэнь Эрюш Вежай