From Wikipedia, the free encyclopedia
По́за — те ярсамо-симема пель.
Вирень тикшенть позантень пурныть вадрясто, костить сонзэ аволь чи ало (лато ало), ванстыть чеерь эйсте. Эрьва тикшентень пурнави: карво тикше, чай тикше, варакань пря тикше, кстый. Неень шкасто путыть тикше. Икеле шкатнестэ тевс ютавтыльть сюронь сюват.
«Позань путомась» — те покш Инетев эрзятнень ютксо, теде соды весе куринкась, ды велесь. Якстерькайтне парсте шлявить, урядавить, човавить ды путовить каштомс чугунонь вакансо. Пидевить чи-ведень седе ламо. Икелень шкасто каштом кургонть ваднилизь сёвоньсэ — а лисевель псись.
Анокставить позантень лепень эли тумонь парьсэ. Пичень ды поеньсесь — а маштовить, васеньценть эйстэ лиси пиче ой, кона сови позантень, поесь максы сэпе. Весемикс паро позань тееме — лепень парь — сехте ванькс, сонзэ кирдить ансяк позакс. Коли-коли истямо кедьгесь «яки» кудова: вейке азоравась теезь позанть максы шабранень.
Колияк а теить поза салтома кедьгсэ. Колмо-ниле ведрас стойкась (паресь) вакссто, тютькеде потмаксонть верьде (кедь куншкань кувалмсо) варя — нолдама, чувтонь туло марто суронь эчксэ.
Таргазь парсте пидезь якстерькайтнень каштомсто, каясызь парентень, секень вант тов пештить човасто керсезь тикше. Тов истяжо каить аволь ламо комоля принеть. Ней кадови весе валомс лаки ведьсэ ды каямс чапавтома. Сонзэ саить розень кшинь чапакссто. Паресь пекстави чувтонь вельтямосо, парсте вельтяви сыре вельтямосо, кирдеви лембе таркасо. Истя сон «яки» мерить. Седе мейле ливтсызь сонзэ кудыкелев — келмевтить.
Седе тов панжыть састо паренть вельтявксонть, кунсолыть кода вети прянзо позась — кодамо чинезэ, тыжнэмазо, ды тюсозо. Аватне содасызь не ваноматнева — коли анок карми позась.
Кода позась тыжны паренть алов путыть вакан ды ноцкавтыть тулонть. Истямо нолдавксонть лемдить «васняяк». Те сехте паро позась! Кода симеви — парентень каить седе тов лаки ведь. Те карми омбоце каявкс. Кой-кить тейнить колмоцеяк — меельцекс. Ансяк те карми аволь поза.
Якстерькайтнень пидить знярояк чить, васеньценть пидить, омбоценть таргить, седе тов ёкстасызь каштомс одов. Седе мейле костить лаз лангс путозь, теле видьс. Мейле анокстыть позань анокстома: начтавтыть розь ды путсызь сонзэ лембе каштомос. Лисезь видьметнень пивсэсызь, почтотнень конат тевить (солод) — ведь лангсо пидесызь. Якстерькайтнень ды солодонть путыть анокстазь парьс — сувтемас. Истя паресь икелень шкасто ульнесь аволь весень, ды ульнесь вейсень 15-20 кудораськень, ды якиль кедьте-кедьс. Паренть потсо мендявикс илейстэ теить кирькс, кона кодавови ленгесэ. Кирьксесь теезь сувтемакс якстерькайтнень юткова, ды солодонть кона ашти потмакссо. Кирьксенть верьга каить-путыть керьсезь розь тикше. Эрзянь позантень совавтови вирень комоля, тютькеде ламбамот, ды оргат.
Балдовасо Рузаень буесэ пидильть вирень поза. Якстерькаень печттнень костильть каштомсо ды коли-коли пидильть-рестыльть. Не тантейкатьнень пек вечкильть пакшат — ды лемдильть сынст — «ламбаське». Анокстазь истя якстерькатьнень путыльть вейс юдмас, понгавтыльть коське таркас ды ванстыльть. Тельня «якстерькань кошксе»-тьнень лакавтыльть, ды вецакавтыльть чай тикшень ламбамо ведьсе, конаньтень каильть-путыльть оргат.
Кода сёрмады Эрюш Вежай:
Федай бабам теиксэлизе истя. Анокстыль розь почтонь чапакс. Тейниль розень сюкорнэть. Сюкорнэтнень путылинзе каштомс. Кувать панилинзе, зярс эйстэст а теевить коське сюкорнэть - курягат. Чопода тюжат. Миненекак максниль поремкакс. Сынь ульнесть ламбамнэть ды пек пейс педильть. Неть курягатнень мейле лоподстилинзе лакавтозь ды экшендязь лисьма ведьсэ. Теде мейле куряга веденть педилизе педямкань пачк. Каиль те де лоподь веденть парькас эли битонс, ды путыль тозонь оргат аламнешка. Эли теевиль комоляведь оргатнень таркас. Позанть якамганзо, парькась путовиль лембине таркас. Колмошка чинь ютазь эрзянь позась аноколь. Теде мейле позась ливтявиль экше таркас. Экшинесь седе тантей симемстэ. Кизна позась пек маштови салведень тейнеме.