From Wikipedia, the free encyclopedia
Apartheid ("bida apartada") ye ua palabra de ourige afrikaanes' ', adotada lhegalmente an 1948 na África de l Sul para chamar un regime segundo l qual ls brancos detenian l poder i ls outros pobos éran oubrigados a bibir apartados de ls brancos, d'acordo cun regras que ls ampedian de ser berdadeiros cidadanos. Este regime fui abolido por Frederik de Klerk an 1990 i, por fin, an 1994 fúrun rializadas eileiçones lhibres.
L purmeiro registro de l uso desta palabra ancontra-se nun çcurso de Jam Smuts an 1917. Este político tornou-se Purmeiro-menistro de la África de l Sul an 1919. Tornou-se de uso quaije quemun an muitas outras lhénguas. Las traduçones mais adequadas para mirandés son apartaçon racial ó política de apartaçon racial.
L apartheid fui amplementado por lhei. Las restriçones a seguir nun éran solo sociales mas éran oubrigatórias pula fuorça de la lhei.
Pessonas que nun éran brancos éran scluídos de l gobierno nacional i nun podien botar fuora an eileiçones para anstituiçones apartadas que nó tenien qualquiera poder.
Als negros éran proibidos dibersos ampregos sendo-les tamien negado ampregar brancos. Nó-brancos nun podien mantener negócios ó práticas porfissionales an qualesquiera árias chamadas solamente para brancos. Cada metrópole segneficante i praticamente todas las árias comerciales stában drento dessas árias. Ls negros sendo un cuntingente de 70% de la populaçon, fúrun puostos fuora de todo menos un pequeinho cacho de l paíç, a nun ser que eilhes tubíssen un passe que era ampossible pa la maiorie cunseguir. La amplementaçon desta política resultou ne l cunfisco de la propiadade i remoçon fuorçada de milhones de negros. Un passe solo era dado a quien tenie trabalho aprobado; mulhieres i ninos tenien que ser deixadas pa trás. Esse passe era eimitido por un magistério çtrital cunfinando solo ls (negros) que l tenian naqueilha ária. Nun tener un passe bálido fazie un negro sujeito a la prison eimediata, julgamiento sumário i "deportaçon" de la "pátria". Biaturas de la polícia que cuntenian l simblo sjambok de la polícia basculhában la "ária branca" pa anquadrar ls negros "eilegales".
La tierra cunferida als negros era an giral mui pobre, ampossibelitada de dar recursos a la populaçon fuorçada a eilha. Las árias de negros raramente tenien saneamiento ó eilatricidade.
Ls spitales éran segregados, sendo ls çtinados a brancos capazes de fazer frente a qualquiera un de l mundo oucidental i ls çtinados a negros, cumparatibamente, tenien séria falta de pessonal i fondos i éran, de lhoinge, lhemitados an númaro. Las ambulánças éran segregadas, fuorçando cun que la raça de la pessona fusse corretamente eidantificada quando essas éran chamadas. Ua ambulánça "branca" nun lhebarie un negro al spital. Ambulánças pa negros tipicamente cuntenian pouco ó nanhun eiquipamiento médico.
Ne ls anhos 1970 la eiducaçon de cada nino negra custaba al stado solo un décimo de cada nino branca. Eiducaçon superior era praticamente ampossible pa la maiorie de ls negros: las poucas ounibersidades de alta culidade éran reserbadas pa brancos. Para alhá desso, la eiducaçon probenida als negros era deliberadamente nun chamada pa purpará-los pa la ounibersidade, i si para ls trabalhos pesados çponibles para eilhes.
Camboios i carreira éran segregados. Para alhá desso, camboios pa brancos nun tenien bagones de terceira classe, anquanto camboios para negros éran superlotados i apersentában solo bagones de terceira classe. Carreira de negros parában solo an paradas de negros i ls de brancos, nas de brancos.
Las praias éran racialmente segregadas, cula maiorie (ancluindo todas las melhores) reserbadas pa brancos.
Pecinas públicas i bibliotecas éran racialmente segregadas mas praticamente nun habie pecinas ó bibliotecas para negros. Quaije nun habie parques, cinemas, campos par çporto ó qualesquier amenidades a nun ser puostos policiales nas árias negras. Ls bancos de parques éran marcados "Solo para ouropeus" .
Sexo antre-racial era proibido. Polícias negros nun tenien premisson para prender brancos. Negros nun tenien outorizaçon para cumprar la maiorie de las bubidas alcoólicas. Un negro poderie star sujeito a la pena de muorte por biolar ua branca, mas un branco que biolasse ua negra recebie solo ua multa, i quaijeque siempre nin esso.
Ls cinemas nas árias brancas nun tenien permisson para aceitar negros. Restourantes i houteles nun tenien premisson pa aceitar negros, a nun ser cumo funcionários.
Tornar-se nembro an sindicatos nun era premitido als negros até ls anhos 1980, i qualquiera sindicato "político" era banido. Grebes éran banidas i mui reprimidas. Negros pagában ampuostos subre ua renda baixa de l nible de R30 (Rand, la moneda oufecial na África de l Sul) al més (cerca de 15 libras ne ls anhos 70), l lhemite de eisençon de l brancos era muito mais alto.
L apartheid perbertiu la cultura Sul-Africana, assi cumo las sues lheis. Un branco que antrasse nun soto serie atendido purmeiro, delantre de negros que yá stában na fila, andependiente de la eidade ó qualquiera outro fator. Até ls anhos 1980, de l negros siempre se asperarie que decéssen de la calçada para dar passaige a qualquiera pedestre branco. Un nino branco serie chamado de "klein baas" (pequeinho patron) talbeç cun un sorriso amarielho por un negro; un negro adulto deberie ser chamado de "garoto", na sue cara, por brancos.
Ye antressante eisaminar l que motibou ls criadores de las políticas de apartheid i qual bison de l mundo fui defendida por essas pessonas para justeficar tal çcreminaçon.
Ye quemun cunsiderar que l apartheid ten cumo centro de sues fés que (I) outras raças son anferiores, (II) tratamiento anferior la raças "anferiores" ye apropiado, i (III) tal tratamiento deberie ser reforçado pula lhei. Assi i todo, ténen eisistido i cuntinan a eisistir apologistas académicos para l apartheid que argumentan que anque de la amplementaçon de l apartheid na África de l Sul tener sues falhas, tenie la antençon por sous arquitetos de ser un sistema que separasse las raças, prebenindo ls "Brancos" (i outras minories) de séren "angolidos" i perdíren sue eidantidade, mas tratarie, assi i todo, las raças de forma justa i eigual. Heirman Giliome an sou lhibro Ls Afrikaners çcribe quantos de la lhiderança anteletual de l Afrikaners tenien buonas antençones genuínas. El nun respunde mas, la queston de cumo la eilite anteletual fui capaç de jogar l jogo "nun beias l mal, nun oubas l mal, nun fales de l mal" tan bien por tanto tiempo, anque ancarar cun las crueldades de l apartheid diariamente.
Un causo an çcusson ye l decumiento Afrikaner Broederbond refrenciado ambaixo. Nel ye afirmada la fé Afrikaner na democracie i ne ls percípios Crestianos. Sue bison de la democracie, assi i todo, sistematicamente scluiu nó-brancos, i sou antendimiento de l percípios Crestianos nun stendian l tratamiento eigual als sous bezinos negros. Aparentemente eilhes reconhecian negros cumo sendo anferiores ó "defrentes demais" para séren tratados de forma eigual.
Ua splicaçon ousada puls apologistas cumo çculpa para ls biolentos brancos sul-africanos ye que, ua beç amplantado l apartheid a punto de las bítimas nun mais séren cidadanos de la África de l Sul, mas si cidadanos de las "pátrias" nominalmente andependientes ó Bantuston que trabalhában na África de l Sul cumo portadores de lhicença temporária de trabalho, eilhes nun mais se cunsiderában respunsables pul sou bien-star.
L gobierno sul-africano tentou debedir l Stado de la África de l Sul recoincido anternacionalmente nun sin númaro de republicas. Algo cumo 87% de la tierra era reserbada als brancos, mestiços, i andianos. Cerca de 13% de la tierra era dibedida an dieç "pátrias" fragmentadas para ls negros (80% de la populaçon) als quales era dada "andependéncia", anque de la outonomie ser mais teórica que rial: l eisército de la África de l Sul anterbinerie para remober gobiernos de las "pátrias" que amplementéssen políticas que nun fússen de l gusto de la África de l Sul. L gobierno de la África de l Sul tentou traçar ua eiquibaléncia antre sue bison de "cidadanos" negros nas "pátrias" i la bison de la Ounion Ouropéia i de l Stados Ounidos subre eimigrantes eilegales benidos de la Ouropa Ouriental i América Lhatina, respetibamente.
Adonde la África de l Sul se defrenciaba de outros países ye que, anquanto estes çmantelában sue lhegislaçon çcreminatória i tornában-se mais abiertos an assuntos relacionados a la raça, la África de l Sul custruía un lhabirinto lhegal de çcreminaçon racial. Que ls brancos sul-africanos cunsiderássen la amplementaçon de l apartheid neçaira puode tener sido motibado por studos demográficos; cumo minorie que staba deminuindo an relaçon al total de la populaçon, habie un pensamiento ancómodo de ser angolido pula maiorie negra, i de perder sue eidantidade atrabeç de casamientos anter-raciales se esso fusse premitido.
La África de l Sul fui colonizada puls nerlandeses i británicos de l seclo XVII an delantre. Cumo acuntecie normalmente ne l causo de quelónias na África, ls colonizadores Ouropeus dominában ls natibos atrabeç de cuntrole político i melitar i de l cuntrole de la tierra i de la riqueza.
Depuis de la Guerra de l Bóeres antre ls andependentistas bóeres i ls angleses, fui criada la Ounion Sul-Africana an 1910, cul statuto de Domínio de l Ampério Británico. Ambora l sistema quelonial fusse eissencialmente un regime racista, fui nesta fase que se ampeçórun a fraugar las bases lhegales para l regime de l apartheid. Por eisemplo, na própia custituiçon de la Ounion, ambora fusse cunsiderada ua república ounitária, cun un solo gobierno, solo na Porbíncia de l Cabo ls nó-brancos que fússen propietários tenien dreito al boto, porque las porbíncias mantenien algua outonomie.
Ua de las purmeiras lheis aporfilhadas fui l "regulamiento de l Trabalho Andígena" ("The Natibe Lhabour Regulation At", an anglés) de 1911, segundo la qual era cunsiderado un crime - solo para ls "africanos", ó seia, ls "nó-brancos", la quebra dun cuntrato de trabalho. Inda ne l mesmo anho, fui promulgada la "Lhei de la Eigreija Reformada Nerlandesa" ("The Dutch Reformed Church At"), que proibie ls negros de se tornáren nembros de pleno dreito daqueilha eigreija.
Mais amportante inda fui la "Lhei de la Tierra" ("Natibes Lhand At") de 1913, que dibediu la África de l Sul an árias adonde solo negros ó brancos podien tener la posse de la tierra: ls negros, que custituían dous terços de la populaçon, quedórun cun dreito a 7,5 % de la tierra, anquanto ls brancos, que éran solo un quinto de la populaçon, quedórun cun dreito a 92,5 % de la tierra; ls mestiços ("coloured") nun tenien dreito a la posse de la tierra. Esta lhei detreminaba eigualmente que ls "africanos" solo poderien bibir fura de las sues tierras quando ampregados de ls brancos. Passou tamien a ser eilegal la prática usual de tener rendeiros negros nas plantaçones.
Ne ls anhos que se seguírun a la bitória de l Partido Nacional nas eileiçones gerales de 1948, un grande númaro de lheis fúrun aprobadas, anstituindo inda mais la dominaçon de la populaçon branca subre outras raças.
Las percipales lheis de l apartheid fúrun las seguintes:
An 21 de Márcio de 1960, 5.000 pessonas negras cungregadas an Sharpebille demunstrórun contra l requerimiento para negros trazéren las eidantidades (debaixo de las regras stipuladas na Lei de la Lhicença). La polícia abriu fuogo ne ls protestantes, matando 69 i ferindo 180. Todas las bítimas éran negras. La maiorie deilhas fui baleada nas cuostas. L Coronel J. Pienaar, l oufecial de la polícia ancarregado ne l die, fui bisto dezindo que: "Hordas de natibos cercórun la delegacie. Miu carro fui acertado cun ua piedra. Se fázen essas cousas, eilhes dében daprender la liçon de l modo defícel."
Esse eibento quedou coincido cumo l Massacre de Sharpebille. Cumo cunsequéncia, l gobierno baniu l Cungresso Nacional Africano (CNA) i l Cungresso Panafricanista (PAC).
L eibento lhebou a ua grande mudança nas táticas de l ANC, mudando de meios pacíficos para meios biolentos. Anque sues ounidades tenéren detonado bombas ne ls eidifícios de l gobierno ne ls anhos seguintes, l ANC i l PAC nun éran amenaças al Stado, que tenie l monopólio de armamiento moderno.
La Assemblé Giral de las Naciones Ounidas aprobou la Resoluçon 1761 an 6 de Nobembre de 1962 que cundenou las políticas racistas de l apartheid sul-africano i pediu que todos ls países-nembros de la ONU cortássen las relaçones melitars i eiquenómicas cula África de l Sul.
An 1964, Nelson Mandela, lhíder de l ANC, fui cundenado la prison perpétua.
An 1974 l gobierno aprobou l Decreto de Média Afrikaanes que fuorçaba todas las scuolas la ousáren l africánder quando ansinássen als negros matemática, ciéncias sociales, geografie i stória nas scuolas secundárias. Punt Janson, l bice-menistro de eiducaçon bantu dixe: "You nun cunsultei l pobo Africano na queston de la lhéngua i nun bou cunsultar. Un Africano puode achar que 'l xefe' solo fala Afrikaanes ó solo fala Anglés. Serie bantajoso para el saber las dues lhénguas".
Essa política fui perfundamente ampopular. An 30 de Abril de 1976, ninos de la scuola purmária Orlando West ne l Soweto antrórun an grebe, recusando-se a ir a las aulas. La rebelion spalhou-se por outras scuolas an Soweto. Ls studantes ourganizórun un protesto an massa para 16 de Júnio de 1976, que acabou cun bioléncia - la polícia respundendo cun balas a las piedras atiradas pulas ninos. L ancidente çparou ua óndia de bioléncia generalizada por to la África de l Sul, custando cientos de bidas.
Anternacionalmente, la África de l Sul quedou eisolada. Muitas cunferéncias acuntecírun i las resoluçones de las Naciones Ounidas fúrun aprobadas cundenando-la, ancluindo la Cunferéncia Mundial Contra l Racismo an 1978 i 1983. Un eimenso mobimiento de cerceamiento de dreitos ampeçou-se, pressionando ls ambestidores a se recusáren a ambestir an ampresas de la África de l Sul ó ampresas que fazíssen negócios cula África de l Sul. Ls eiquipas de çporto de la África de l Sul fúrun barrados de partecipáren de eibentos anternacionales, i l turismo i la cultura sul-africanos fúrun buicotados.
Esses mobimientos anternacionales, cumbinados cun porblemas anternos, cumbencírun l gobierno Sul-Africano que sue política de lhinha-dura era andefensable i an 1984 alguas reformas fúrun antroduzidas. Muitas de las lheis de l apartheid fúrun repelidas, i ua nuoba custituiçon fui antroduzida que daba repersentaçon lhemitada a ciertos nó-brancos, anque nun stendé-las a la maiorie negra. La bioléncia cuntinou até ls anhos 1980.
Ls anhos mais biolentos de l anhos 80 fúrun ls de 1985 la 1988, quando l gobierno P. W. Botha ampeçou ua campanha para eiliminar ls oupositores. Por trés anhos la polícia i ls suldados patrulhórun las cidades sul-africanas an beiclos armados, çtruindo campos pertencentes a negros i detendo, abusando i matando cientos de negros. Rígidas lheis de censura tentórun scunder ls eibentos, banindo la média i ls jornales.
An 1989, F. W. de Klerk sucediu la Botha cumo persidente. An 2 de Febreiro de 1990, na abiertura de l parlamiento, de Klerk declarou que l apartheid habie fracassado i que las proibiçones als partidos políticos, ancluindo l ANC, serien retiradas. Nelson Mandela fui lhibartado de la prison. De Klerk seguiu abolindo todas las lheis remanescentes que apoiában l apartheid.
Mandela torna-se persidente nas purmeiras eileiçones persidenciales lhibres an muitos anhos. An 15 de Abril de 2003, l sou sucessor, persidente Thabo Mbeki anunciou que l gobierno de la África de l Sul pagarie 660 milhones de Rand (aprossimadamente 85 milhones de dólares norte-amaricanos) para cerca de 22 mil pessonas que habien sido torturadas, detidas ó que habien perdido familiares por cunsequéncia de l apartheid. La Comisson de la Berdade i Recunciliaçon, formada para ambestigar ls abusos de la era de l apartheid, habie recomendado al gobierno pagar 3000 milhones de rands an cumpensaçon, puls cinco anhos seguintes.
L apartheid Sul-africano fui cundanado anternacionalmente cumo anjusto i racista. An 1973 la Assemblé Giral de las Naciones Ounidas aprobou l testo de la Cumbençon Anternacional de la Puniçon i Supresson al crime de l Apartheid. La antençon eimediata de la cumbençon era dar la strutura formal i lhegal pa que ls nembros podíssen aplicar sançones para pressionar ls gobiernos Sul-africanos a mudar sues políticas. Antretanto, la cumbençon fui fraseada, an termos gerales, cula antençon spressa de la proibiçon de que qualquiera outro stado adote políticas parecidas. La cumbençon ganhou fuorça an 1976.
L Artigo II de la cumbençon define l apartheid assi:
Pul propósito de la persente cumbençon, l termo "crime de apartheid", que debe ancluir práticas de segregaçon i çcreminaçon racial i políticas similares, cumo las praticadas ne l sul de la África, debe aplicar-se als seguintes atos zoumanos cometidos cul propósito de stablecer i mantener la dominaçon dun grupo racial de pessonas subre qualquiera outro grupo racial de pessonas i la oupresson sistemática destas:
L crime tamien fui definido na Corte Creminal Anternacional:
An 10 de Márcio de 1994, Nelson Mandela fizo l juramiento cumo persidente de la África de l Sul delantre dua oufórica multidon. Dentre sues purmeiras açones fui criada la Comisson Berdade i Recunciliaçon i rescrebida la Custituiçon. Na eileiçon multi-racial seguinte, l ANC de Mandela ganhou cun ancha bantaige, treminando afatibamiente cula era de l apartheid.
La ardança de l apartheid i las zeigualdades sócio-eiquenómicas que eilha promobiu i sustentou puoden benir a prejudicar la África de l Sul por muitos anhos ne l feturo.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.