![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/61/Watchtower_Bible_%2526_Tract_Society_%2528world_headquarters%2529.jpg/640px-Watchtower_Bible_%2526_Tract_Society_%2528world_headquarters%2529.jpg&w=640&q=50)
Teçtemunhas de Jeobá
From Wikipedia, the free encyclopedia
L mobimiento religioso coincido por Teçtemunhas de Jeobá assume-se cumo ua religion crestiana nun-trinitária. Afírman adorar sclusibamente la Jeobá i cunsidírun-se seguidores de Jasus Cristo. Crénen que la sue religion ye la restauraçon de l berdadeiro crestianismo, mas reijeitan la classeficaçon de séren fundamentalistas ne l sentido an que la palabra ye quemumente ousado [1]. Afirman basear todas las sues práticas i doutrinas ne l cuntenido de la Bíblia [2].
![Thumb image](http://upload.wikimedia.org/wikipedia/commons/thumb/6/61/Watchtower_Bible_%26_Tract_Society_%28world_headquarters%29.jpg/640px-Watchtower_Bible_%26_Tract_Society_%28world_headquarters%29.jpg)
Possúen adetos an 240 paízes i territórios outónomos, ascendendo a mais de 8,3 milhones i cen mil praticantes [3], apesar de reuníren un númaro muito superior de simpatizantes. Segundo l Anuairo de las Teçtemunhas de Jeobá de 2017, 20.085.142 pessonas assistírun a la Comemoraçon de la Morte de Cristo custituindo un númaro bien superior als de ls nembros atibos, ó seia, outros dieç milhones de simpatizantes ténen assistido a las sues reuniones i/ó partecipado de sous cursos bíblicos sumanales.
Las Teçtemunhas de Jeobá son bien coincidas pula sue regularidade i grande persisténcia na obra de ebangelizaçon de casa an casa i nas rues. Possúen un de ls maiores parques gráficos de l mundo bisando la ampresson i çtribuiçon de centenas de milhones d'eisemplares de la Bíblia i de publicaçones baseadas neilha. Cumo parte de la sue adoraçon la Dius, assisten sumanalmente la reuniones cungregacionales i la grandes eibentos anuales, onde l studo de la Bíblia custitui la percipal temática. Son inda coincidas por recusáren muitas de las doutrinas centrales de las demais religiones crestianas, pul apego la fuortes balores qu'afirman ser baseados na Bíblia, nomeadamente quanto a la neutralidade política [4], a la moralidade sexual [5], a la hounestidade [6][7] i a la recusa an aceitar trasfusones de sangue[8].
Alguns las chaman de propagandistas crestianos, dun nuobo culto crestiano, dua seita crestiana anfluenciada pul judaísmo ó de fanáticos que reijeitan tratamiento médico. Todabie, la Associaçon Mundial de las Teçtemunhas de Jeobá refuta tales afirmaçones. Segundo las Teçtemunhas de Jeobá, nun amporta quanto les custe esso, dízen seguir a la risca ls preceitos bíblicos. Afirman que nun ambentórun ua nuoba religion, mas solo seguen l que stá escrito na Bíblia, i que nun amporta qual seia la situaçon, eilha cuntén las ourientaçones i ls cunselhos para sues bidas. Afirman que sues crenças, ensinos i atibidades son baseadas neilha, i por esso ancentiban la sue leitura diária[9]. Para ajuda al antendimiento bíblico, sues publicaçones son porduzidas i çtribuídas an muitas campanhas missionárias al redror de l mundo.