Stória de Macau
From Wikipedia, the free encyclopedia
La Stória (Houmana) de Macau ten pul menos 6000 anhos. Eilha ye mui rica i dibersificada porque Macau, zde de la chegada de ls pertueses ne l seclo XVI, fui siempre ua amportante puorta de acesso para la antrada de la ceblizaçon oucidental na China, cuntatando cula ceblizaçon chinesa, i al alrobés. Este pequeinho cacho de tierra proporcionou ua amportante plataforma para la simbiose i l antercámbio de culturas oucidentales i ourientales. Esta antensa simbiose i antercámbio moldórun ua eidantidade sola i própia para Macau.
Macau fui yá poboada por pescadores i camponeses chineses quando ls pertueses stablecírun-se an 1557 nesta lhocalidade. Eilhes, acupando als poucos [1] Macau, debrebe trouxírun prosperidade la este pequeinho pedaço de tierra que se lhocaliza junto a la foç de l Riu de las Pérolas, tornando-la nua grande cidade comercial. Macau ye cunsidrado l purmeiro antreposto ouropeu an tierra chinés i tenie un grande balor, percipalmente al nible comercial i stratégico, pa ls pertueses porque era un amportante antermediário ne l quemércio antre la China, la Ouropa i l Japon.
Mesmo atacado bárias bezes por outras poténcias ouropeias, nomeadamente puls houlandeses, esta cidade atingiu l sou auge durante ls finales de l seclo XVI i ls ampeços de l seclo XVII. Mas, durante l seclo XIX, Macau ampeçou a antrar debrebe an declínio por causa de l stablecimiento de Hong-Kong puls angleses. Esta nuoba quelónia británica cedo tornou-se ne l porto oucidental mais amportante de la China. Mesmo assi, Macau, an 1865, custruiu l purmeiro farol de l mar de l Sul de la China, l Farol de la Guia. Solo an 1887 ye que la China reconheciu oufecialmente la soberanie i la acupaçon perpétua pertuesa subre Macau, atrabeç de l Tratado de Amisade i Comércio Campana-Pertués.
An 1901, l Gobierno de Macau, querendo criar la sue própia moneda oufecial, outorizou, l Vanco Nacional Ultramarino (BNU) a emitir notas cula chamaçon de patacas. Las purmeiras notas ampressas ampeçórun a antrar an circulaçon an 1906 i 1907. A partir de 1995, l Banco de la China passou tamien a ser respunsable pula eimisson de notas.
Esta quelónia pertuesa nun fui ambadida pulas tropas japonesas, eibitando assi ls grandes horrores de la Segunda Guerra Mundial. Passado la amplantaçon de la República Popular de la China (1949), esta cidade spriénciau alguns ancidentes i motines probocados puls chineses residentes pró-quemunistas que querien reunir Macau a la China. Estes ancidentes, percipalmente l Motin 1-2-3 lhebantado puls residentes chineses pró-quemunistas de Macau ne l die 3 de Dezembre de 1966, forçou Pertual a renunciar la sue acupaçon perpétua subre Macau. An 1987, passado antensas negociaçones antre Pertual i la República Popular de la China i atrabeç de la Declaraçon Cunjunta Campana-Pertuesa subre la Queston de Macau, ls dous países cuncordórun que Macau eirie passar de nuobo a la soberanie chinesa ne l die 20 de Dezembre de 1999, tornando-se nua Region Admenistratiba Special.
Macau, para alhá de ser l purmeiro antreposto ouropeu na China, fui tamien la redadeira quelónia ouropeia na China.