From Wikipedia, the free encyclopedia
La Ourganizaçon de las Naciones Ounidas (ONU) fui oufecialmente a 24 de Outubre de 1945 an San Fracisco, Califórnia, por 51 países, lhougo apuis la fin de la Segunda Guerra Mundial. La purmeira Assemblé Giral ajuntou-se a 10 de Janeiro de 1946 (an Westminstener Central Hall, na cidade de Londres). La sue sede atual ye na cidade de Nuoba Yorque.
![]() | |
---|---|
![]() | |
![]() | |
Tipo | Ourganizaçon anternacional |
Comando | António Guterres |
Stado | atiba |
Sítio | www.un.org |
Commons | ![]() |
Antrepassado de las Naciones Ounidas fui la Sociadade de las Naciones (tamien coincida cumo "Lhiga de las Naciones"), ourganizaçon cuncebida an circustáncias aparecidas na Purmeira Guerra Mundial i stablecida an 1919, cunsante l Tratado de Bersalhes, "para pormober la coperaçon anternacional i cunseguir la paç i la sigurança". An 2006 la ONU ten la repersentaçon de 192 Stados-Nembros - cada un de l países soberanos anternacionalmente recoincidos, fuora la Santa Sé, que ten la culidade de ouserbador, i países sin recoincimiento pleno (cumo Taiwan, que ye un território reclamado pula China, mas de recoincimiento soberano por outros países).
Un de ls feitos mais amportantes de la ONU fui la aprobaçon de la Declaraçon Ounibersal de ls Dreitos Houmanos, an 1948.
La eideia de las Naciones Ounidas fui formalmiente puosta nua Declaraçon, assinada anquanto se daba la Segunda Guerra Mundial, na cunferéncia de Aliados feita an Moscobo an 1943. L persidente de l Stados Ounidos de la América, Franklin Delano Rosevelt, dou l'eideia de l nome de "Naciones Ounidas"[1] a partir de cumbersas que antes tubira cun outros xefes, cumo Churchill[2], yá zde l Natal de 1941.
An 25 de Abril de 1945 fizo-se la purmeira cunferéncia an San Fracisco. A la parte de l gobernos, fúrun cumbidadas ourganizaçones nun gobernamentales. Las 50 naciones repersentadas na cunferéncia assinórun la Carta de las Naciones Ounidas a 26 de Júnio, i la Polónia, que nun stubo representada na cunferéncia, acrecentou l sou nome mais tarde, passando para 51 l númaro de Stados antegrantes de la ourganizaçon.
La ONU ampeça la sue eisistença a 24 de Outubre de 1945, depuis de la Carta haber sido rateficada puls anton cinco nembros permanentes de l Cunseilho de Sigurança (República Popular de la China, Fráncia, Ounion de las Repúblicas Socialistas Sobiéticas, Reino Ounido i Stados Ounidos de la América) i pula grande maiorie de ls outros 46 nembros.
Atualmente ls cinco nembros permanentes de l Cunseilho de Sigurança son ls únicos que ténen poder de beto nas decisones. Estes son ls Stados Ounidos de la América, la Federaçon Russa, la Fráncia, l Reino Ounido i la República Popular de la China.
- Mantener la paç mundial
- Defender ls Dreitos Houmanos
- Pormober l zambolbimiento eiquenómico i social de las naciones
- Animar a la outonomie de ls pobos dependientes
- Reforçar ls lhaços antre todos ls stados soberanos
La ONU usa 6 lénguas oufeciales: árabe, chinés, spanhol, francés, anglés i russo. Quaijeque todas las reuniones oufeciales son traduzidas al mesmo tiempo para estas lénguas. Quaijeque todos ls decumientos oufeciales, an papel i "on-line", son traduzidos pa estas seis lénguas. An alguas dependéncias, las cunferéncias i ls decumientos de trabalho son solo an francés i anglés ó an spanhol, francés i anglés i las publicaçones sálen nestas dues ó trés lénguas.
La Assemblé Giral ye custituída por todos ls Stados nembros, cabendo-le a cada un deilhes un boto (art. 9º, nº 1, i art. 18º, nº1, de la Carta de las Naciones Ounidas).
L Cunseilho de Sigurança ye custituído por quinze Stados, sendo cinco nembros permanentes (China, Fráncia, Federaçon Russa, Reino Ounido i Stados Ounidos) i dieç eileitos pula Assemblé Giral, por dous anhos (art. 23º, de la Carta de las Naciones Ounidas). La sue percipal funcion ye garantir la Sigurança Coletiba i la Manutençon de la Paç Mundial. Para cumprir esse oujetibo, l Cunseilho puode botar mano de ls strumientos prebistos ne l Capítulo VI, que trata de ls meios pacíficos de selucion de cuntrobérsias, de la Carta de las Naciones Ounidas (ó Carta de San Fracisco) ó de l Capítulo VII, meios nun pacíficos de selucion de cuntrobérsias, de l mesmo decumiento.
L Cunseilho Eiquenómico i Social ye custituído por 54 nembros, eileitos pula Assemblé Giral por trés anhos (art. 61º de la Carta de las Naciones Ounidas).
L Cunseilho de Tutela ye cumpuosto por Stados nembros que admenístran territórios ne l sou mando, por outros tantos nembros nun admenistradores de territórios ambaixo tutela eileitos pula Assemblé Giral i puls nembros de l Cunseilho de Sigurança ( art. 86º, nº 1, de la Carta). L Cunseilho de Tutela fui l uorgano que tubo mais éisito an sous oujetibos, tornando muitos territórios tutelados an países soberanos i, antoce, países nembros de las Naciones Ounidas. Debido a este éisito, l Cunseilho de Tutela ancerrou, an 1994, las sues atebidades streformando an paíç soberano l redadeiro território tutelado de l mundo, que fui Palau, ne l Pacífico.
L Tribunal Anternacional de Justícia ye l percipal uorgano judicial de la ONU i l sou Statuto ye parte antegrante de la Carta (art. 92º de la Carta). L Tribunal, que queda an Haia, stá abierto a todos ls nembros de las Naciones Ounidas i a aqueilhes que, nun sendo nembros, aderírun al Statuto (art. 93º de la Carta). La Suíça ye l único Stado nun nembro que aderiu al Statuto. Tamien chamado de Corte Anternacional de Justícia, este Tribunal ten sido mui craticado por star prebisto na Carta de la ONU que ls países dében de aceitar la sue jurdiçon, antoce, jurdiçon beluntária. Para alhá desso, l mesmo nun aceita denúncias de andebíduos, l que deixa l sou campo de atuaçon bastante lhemitado i, para alguns, de fácele outelizaçon política de l mesmo.
"L Secretariado ye cumpuosto por un secretário-giral i pul pessonal eisigido pula Ourganizaçon." (art. 97º de la Carta).
Cun l acrecento de Montenegro an 28 de Júnio de 2006, eisisten atualmente 192 países nembros de las Naciones Ounidas, ancluindo todos ls Stados andependientes plenamente recoincidos [3] para para alhá de la Cidade de l Baticano, que ten l statuto de oubserbador..[4]
La Carta de las Naciones Ounidas çcribe las regras de adeson:
- Filiaçon na Ourganizaçon de las Naciones Ounidas ye abierta a todos ls stados que ámen la paç i que aceitáren las oubrigaçones cuntenidas na persente Carta i, ne l antender de la ourganizaçon, son capazes i stan çpuostos a rializar estas oubrigaçones.
- La admisson de qualquiera desses stados, la antrada nas Naciones Ounidas será feita por ua decision de la Assemblé Giral, por recomendaçon de l Cunseilho de Sigurança.
—Carta de las Naciones Ounidas, capítulo 2, artigo 4
L Grupo de ls 77 nas Naciones Ounidas ye un juntouro de naciones an zambolbimento, çtinados a pormober ls sous nembros »coletiba de ls antresses eiquenómicos i de criaçon dun refuorço de la capacidade de negociaçon cunjunta na Ourganizaçon de las Naciones Ounidas. Habie 77 nembros fundadores de la ourganizaçon, mas la ourganizaçon ten, atualmente, 130 países nembros. L grupo fui fundado an 15 de Júnio de 1964 pula "Declaraçon Cunjunta de l Setenta i Siete Países" salida por oucasion de la Cunferéncia de las Naciones Ounidas subre Comércio i Zambolbimiento (UNCTAD). L purmeiro grande ancontro fui an Argel, an 1967.
La ONU ye financiada por cuntrebuiçones beluntárias de ls Stados nembros. Cula duraçon de dous anhos, ls ourçamentos de las Naciones Ounidas i sues agenças specializadas son financiados por abaluaçones. La Assemblé Giral aproba l ourçamiento rigular i manda fazer la abaluaçon para cada nembro. Esta ye mui assente na capacidade relatiba de cada paíç para pagar, cunsante seia medido pul sou Rendimiento Nacional Bruto (RNB), cun correçon de la díbeda sterna i de baixa renda per capita.[6]
La Assemblé stableciu l percípio de que la ONU nun debe de ser mui dependiente de qualquiera nembro para financiar las sues ouparaçones. Assi, eisiste un scalon mássimo, que ampone l montante mássimo de cada nembro que ye abaluado pa l ourçamiento rigular. An Dezembre de 2000, la Assemblé rebiu la scala de abaluaçon global para refletir circustáncias atuales. Cumo parte dessa rebison, l ourçamiento ourdinário lhemite fui reduzido de 25% para 22%. Ls Stados Ounidos son l único nembro que cumpriu l lemite mássimo. Para alhá dua taxa lemite, l balor mínimo abaluado pa qualquiera nembro nacion (ó de 'scalon' taxa) ye fixado an 0,001% de l ourçamiento de la ONU. Tamien, pa ls países menos zambolbidos, un lhemite mássimo de taxa de 0,01% ye aplicado.[6]
L ourçamiento ouparacional atual ye stimado an US$ 4,19 bilhones [6] (bei la tabela pa ls grandes cuntribuidores).
Ua grande parte de las çpesas de la ONU ten a ber cula mission de las Naciones Ounidas: la paç i la sigurança. L ourçamiento pa la manutençon de la paç pa ls anhos de 2005 i 2006 fui de aprossimadamente US$ 5 bilhones (an acumparança cun cerca de US$ 1,5 bilhones pa l ourçamiento de la ONU núcleo ne l mesmo tiempo), cun arrimado a 70.000 melitares çtacados an 17 missiones an to l mundo.[7] Ouparaçones de paç de la ONU son financiadas por abaluaçones, ousando ua fórmula deribada de la scala de financiamiento rigular, mas ancluindo ua subretaxa ponderada pa ls cinco nembros permanientes de l Cunseilho de Sigurança, que debe de aprobar todas las ouparaçones de manutençon. Esta subretaxa sirbe para cumpensar çcuntadas las taxas de manutençon de paç pa la abaluaçon de ls países menos zambolbidos. Zde 1 de Janeiro de 2008], ls 10 percipales pagadores de las cuntribuiçones financeiras de las Naciones Ounidas na manutençon de la paç, fúrun: Stados Ounidos, Japon, Almanha, Reino Ounido, Fráncia, Eitália, China, Canadá, Spanha i de la República de la Coreia. [8]
Porgramas speciales de las Naciones Ounidas nun ancluídos ne l ourçamiento rigular (cumo la UNICEF i PNUD), son financiadas por cuntrebuiçones beluntárias de ls gobernos nembros. L mais deilhas son cuntrebuiçones financeiras, mas algues son an géneros commodities agrícolas dados para la populaçon atingida.
La ONU, cumo antidade, quedou mui andeble apuis de ls Stados Ounidos de la América i alguns aliados habéren ambadido l Eiraque, contra la eideia de la ourganizaçon i de l própio Cunseilho de Sigurança. Ls EUA ousórun l artigo que trata de "legítima defesa", dezindo que l Eiraque tenie armas de çtruiçon an massa de natureza química, biológica i até nuclear.
Ls comissários de la ONU que stubírun ne l Eiraque, antes de la guerra, nun achórun feitiços amportantes dessas armas, mesmo assi, la ambason dou-se.
La amprensa chegou a dar la ambora que ls gobernos norte-amaricano i anglés ambentórun decumientos de acusaçon al Eiraque cumo modo de justeficar la acion melitar. La berdade ye que las tales armas nun fúrun achadas i l Eiraque stá çtruído.
La ONU tamien dende sal derrotada: perdiu prestígio, nun cunseguiu eibitar la guerra contra l Eiraque, funcionários de l sou purmeiro scalon fúrun muortos an atentados, cumo l brasileiro Sérgio Vieira de Mello i, mesmo assi, nun pediu la aplicaçon de sançones contra ls Stados Ounidos porque ten cuncéncia de que dous tércios de l sou ourçamiento bénen daquel paíç.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.