Lógica
From Wikipedia, the free encyclopedia
La lógica ó lhógica (de l griego clássico λογική logos, que quier dezir palabra, pensamiento, eideia, argumento, relato, rezon lógica ó percípio lógico), ye ua ciéncia de índole matemática i fuortemente ligada a la Filosofie. Yá que l pensamiento ye la manifestaçon de l coincimiento, i que l coincimiento busca la berdade, ye perciso stabelecer alguas regras para que essa meta puoda ser atingida. Assi, la lógica ye l ramo de la filosofie que cuida de las regras de l bien pensar, ó de l pensar correto, sendo, antoce, un strumiento de l pensar. La daprendizaige de la lógica nun custitui un fin an si. Eilha solo ten sentido anquanto meio de garantir que l nuosso pensamiento atua bien a fin de chegar la coincimientos berdadeiros. Podemos, anton, dezir que la lógica trata de l argumentos, esto ye, de las cunclusones a que chegamos atrabeç de la apersentaçon de eibidéncias que la sustentan. L percipal ourganizador de la lógica clássica fui Aristóteles, cula obra chamada Uorgano. El debide la lógica an formal i material.
Un sistema lógico ye un cunjunto de axiomas i regras de anferéncia que percuran repersentar formalmente l raciocínio bálido. Defrentes sistemas de lógica formal fúrun custruídos al largo de l tiempo quier na scrita de la Lógica Teórica, quier an aplicaçones práticas na cumputaçon i an Anteligéncia arteficial.
Tradecionalmente, lógica ye tamien l nome para l studo de sistemas prescritibos de raciocínio, ó seia, sistemas que definen cumo se "deberie" rialmente pensar para nun errar, ousando la rezon, dedutibamente i andutibamente. La forma cumo las pessonas rialmente pensan ye studado nas outras árias, cumo na psicologie cognitiba.
Cumo ciéncia, la lógica define la strutura de declaraçon i argumento para eilaborar fórmulas, que atrabeç deilhas estes puoden ser codeficados. Amplícita ne l studo de la lógica stá la cumprenson de l que cria un bun argumento i de quales argumentos son falaciosos.
La lógica filosófica trata cun çcriçones formales de la lenguaige natural. La maior parte de l filósofos assumen que la maior parte de l raciocínio "normal" puode ser acaçada pula lógica, zde que se seia capaç de ancuntrar l método cierto para traduzir la lenguaige corriente para essa lógica.
Ambaixo stan çcussones más cuncretas subre alguns sistemas lógicos. Bei tamien: lista de tópicos an lógica.