Jainismo
From Wikipedia, the free encyclopedia
L jainismo ó jinismo ye ua de las religiones más antigas de la Índia, juntamente cul hinduísmo i l budismo, cumpartilhando cun este redadeiro la ouséncia de la necidade de Dius cumo criador ó figura central. Cunsidra-se que la sue ourige antecede l Bramanismo, ambora seia más probable que tenie surgido na sue forma atual ne l seclo V a.C., an resultado de la açon relegiosa de l Mahabira.
![Thumb image](http://upload.wikimedia.org/wikipedia/commons/thumb/0/07/Gomateswara.jpg/180px-Gomateswara.jpg)
Bista durante algun tiempo puls ambestigadores oucidentales cumo ua seita de l hinduísmo ó ua heiresie de l budismo, debido a la partilha de eilemientos quemuns cun estas religiones, l jainismo ye assi i todo un fenómeno oureginal. Al cuntrário de l budismo, l jainismo nunca tubo un sprito missionário, tenendo permanecido na Índia, adonde ls jainas custituen hoije cerca de quatro milhones de crentes. Pequeinhas quemunidades jainas eisisten tamien na América de l Norte i na Ouropa, an resultado de mobimientos migratórios.
La palabra jainismo ten las sues ouriges ne l berbo sánscrito jin que quier dezir "cunquistador". Ls sous adetos dében cumbatener, atrabeç dua série de stágios, las peixones de modo la alcançar la lhibertaçon de l mundo.
Sue bison básica ye dualista. La matéria i la mónada bital ó jiba son de natureza çtinta, i durante sue bida l ser bibente (seia houmano ó animal) tinge sue mónada cumo resultado de sues açones. Para se purificar, esta religion propone un stremo ascetismo i l colocar an prática de la doutrina de la nó-bioléncia ó ahimsa.