Houlocausto
From Wikipedia, the free encyclopedia
La palabra houlocausto (an griego antigo: ὁλόκαυστον, ὁλον [to] + καυστον [queimado]) ten ouriges remotas an sacrefícios i rituales relegiosos de la Antiguidade, an que animales (por bezes até seres houmanos) éran oufrecidos a las dibindades, sendo cumpletamente queimados durante la nuite pa que naide bisse. Nesse causo, houlocausto quier dezir cremaçon de ls cuorpos. Este tipo de sacrefício tamien fui praticado por tribos judaicas, cumo se eibidencia ne l Libro de l Éxodo capítulo 18, bersíclo 12: Anton, Jetro, sogro de Moisés, trouxo houlocausto i sacrefícios para Dius; (...).
A partir de l seclo XIX, la palabra houlocausto passou a chamar grandes catástrofes i massacres, até que apuis de la Segunda Guerra Mundial l termo Houlocausto (cun einicial maiúscula) passou a ser outelizado specificamente pa se referir al stermínio de milhones pessonas que fazien parte de grupos cunsidrados andesejados pul regime nazista de Adolf Hitler. Habie judius, melitantes quemunistas, homossexuales, ciganos, slabos, deficientes motores, deficientes mentales, prisioneiros de guerra sobiéticos, nembros de la eilite anteletual polaca, russa i de outros países de l Leste Ouropeu, para alhá de atebistas políticos, Teçtemunhas de Jeobá, alguns sacerdotes católicos, alguns nembros mórmons i sindicalistas, pacientes psiquiátricos i creminosos de delito quemun.
Mais tarde, ne l correr de l Julgamientos de Nuremberg, la palabra fui sendo als poucos adotado solamente pa se referir als judius muortos.
Todos estes grupos perecírun lhado a lhado ne ls campos de cuncentraçon i de stermínio, d'acuordo cun testos i retratos, (teçtemunhos de subrebibentes nua stensa decumentaçon deixada puls própios nazistas), perpetradores i de spetadores, i cul saldo de registros statísticos de bários países sob acupaçon. Hoije, yá se sabe aprossimadamente l númaro de muortes. Morrírun 17 milhones de sobiéticos (sendo que 9,5 milhones de cebiles); 6 milhones de judius; 5,5 milhones de almanes (3 milhones de cebiles); 4 milhones de polacos (3 milhones de cebiles); ,2 milhones de chineses; 1,6 milhon de jugoslabos; 1,5 milhon de japoneses; 535.000 (330.000 cebiles) de franceses; 450.000 (150.000 cebiles) de eitalianos; 396.000 de angleses, i 292.000 suldados norte-amaricanos.
Atualmente, l Houlocausto fui outra beç outelizado para çcrebir las grandes tragédias, séian eilhas antes ó depuis de la Segunda Guerra Mundial. Muitas bezes la palabra houlocausto ten sido ousada pa qualquiera stermínio de bidas houmanas eisecutado de forma deliberada i maciça, cumo na que resultarie dua guerra nuclear, falando-se por bezes de houlocausto nuclear.
Shoá (השואה), tamien scrito de la forma Shoah, Sho'ah i Shoa, que an lhéngua iídiche (un dialeto de l alman falado por judius oucidentales ó asquenazitas) quier dezir calamidade, ye la palabra desta lhéngua pa l "houlocausto". Ye ousado por muitos judius i por un númaro crecente de crestianos, debido al çcunfuorto teológico cul seneficado lhiteral de la palabra Houlocausto, que ten ourige de l griego i conotaçon cula prática de heigienizaçon por ancineraçon; estes grupos acraditan que ye teologicamente oufensibo sugerir que ls judius de la Ouropa fúrun un sacrefício la Dius. Ye inda assi reconhecido que la maiorie de las pessonas que úsan la palabra houlocausto, nun l fázen cun essa antençon.
De eigual modo, muitas pessonas ciganas úsan la palabra porajmos ("poráimos"), seneficando deborar, para çcrebir la tentatiba nazi de l stermínio de l grupo.