Ampério Pertués
From Wikipedia, the free encyclopedia
Ampério Pertués ye l nome quemun dado al cunjunto de ls territórios ultramarinos acupados i admenistrados por Pertual a partir de l'ampeço seclo XV até la metade de l seclo XX. La spresson "Ampério Pertués", inda assi, nunca fui ousada oufecialmente. L nome oufecial mais outelizado para cunjunto de ls territórios ultramarinos pertueses fui simplesmente "Ultramar Pertués". Yá l nome "Ampério Quelonial Pertués" fui oufecial, mas solo durante un brebe período, yá ne l seclo XX.
L Ampério Pertués fui l purmeiro ampério global[1] de la stória, cun un cunjunto de territórios repartidos por quatro cuntinentes sob soberanie pertuesa, resultado de las sploraçones rializadas na Era de ls çcubrimientos. Fui l mais duradouro de ls ampérios queloniales ouropeus modernos, yá que la persença pertuesa fura de la Ouropa abrangeu quaije seis seclos. Fui gobernado pula Casa de Abis por cerca de ciento i cinquenta anhos, depuis por sessenta anhos, pula Casa de Habsburgo, mais tarde pula Casa de Vergáncia por trezientos anhos, i a partir de 1910 fui gobernado pula República Pertuesa.
Cumbenciona-se l'ampeço de l Ampério cumo sendo la cunquista de Ceuta an 1415. Yá l final de l Ampério, cunsuante l critério outelizado, puode ser cunsidrado l'anho de 1975 - andependéncia de la maior parte de ls territórios -, l'anho 1999 - fin de l'admenistraçon pertuesa de Macau, l redadeiro território ultramarino inda admenistrado de fato por Pertual - ó l'anho de 2002 - data de l'andependéncia de Timor-Leste, redadeiro território ultramarino cunsidrado de jure sob soberanie pertuesa.[2]