१९७३ महिला क्रिकेट विश्वचषक
From Wikipedia, the free encyclopedia
१९७३ महिला क्रिकेट विश्वचषक ही एक क्रिकेट स्पर्धा इसवी सन १९७३ मध्ये इंग्लंड आणि वेल्समध्ये आंतरराष्ट्रीय महिला क्रिकेट संघटनेद्वारे आयोजित गेली होती. क्रिकेट खेळामध्ये पुरुष अथवा महिला प्रकारात प्रथमच अशी बहुदेशीय स्पर्धा भरवली गेली. पुरुषांच्या विश्वचषकाआधी दोन वर्षे ही क्रिकेटमधील पहिली विश्वचषक स्पर्धा होती. सर्व सामने महिला आंतरराष्ट्रीय एकदिवसीय सामने या प्रकारामध्ये खेळवले गेले. यजमान इंग्लंड संघाने पहिली वहिली स्पर्धा जिंकली. या विश्वचषकाचा जन्म एका प्रसिद्ध उद्योगपति सर जॅक हेवर्ड यांच्या संकल्पनेतून झाला. त्यांनीच या स्पर्धेच्या आयोजनासाठी ४०,००० युरो इतके भांडवल देऊ केले.
१९७३ महिला क्रिकेट विश्वचषक | |||
---|---|---|---|
चित्र:1973 Women's Cricket World Cup logo.png १९७३ महिला क्रिकेट विश्वचषक अधिकृत प्रतिक चिन्ह | |||
तारीख | २० जून – २८ जुलै १९७३ | ||
व्यवस्थापक | आंतरराष्ट्रीय महिला क्रिकेट संघटना | ||
क्रिकेट प्रकार | महिला आंतरराष्ट्रीय एकदिवसीय सामने (६० षटके) | ||
स्पर्धा प्रकार | गट फेरी | ||
यजमान |
इंग्लंड वेल्स | ||
विजेते | इंग्लंड (१ वेळा) | ||
सहभाग | ७ | ||
सामने | २१ | ||
सर्वात जास्त धावा | एनीड बेकवेल (२६४) | ||
सर्वात जास्त बळी | (यं.इं.) रोझलिंड हेग्स (१२) | ||
दिनांक | २० जून – २८ जुलै १९७३ | ||
|
या विश्वचषकात एकूण ७ संघांनी सहभाग घेतला. १९७१ मध्ये दक्षिण आफ्रिकेवर वर्णभेदाच्या मुद्द्यावरून बहिष्कृत केल्यामुळे दक्षिण आफ्रिकेच्या महिला संघाला या स्पर्धेत भाग घेण्यापासून मज्जाव करण्यात आला. त्यामुळे तत्कालिन ३ महिला कसोटी देश : यजमान इंग्लंड, ऑस्ट्रेलिया, न्यू झीलंड; आणि जमैका, त्रिनिदाद आणि टोबॅगो ह्या देशांच्या महिला संघांना आमंत्रित करण्यात आले. तेव्हा अजून वेस्ट इंडीजचा महिला संघ अस्तित्वात नव्हता. आणखी दोन संघांनी यात भाग घेतला: आंतरराष्ट्रीय XI आणि इंग्लंडमधून २३ वर्षांखालील एक संघ यंग इंग्लंड. विश्वचषकात खेळवला गेलेला पहिला सामना हा जगातला पहिला महिला आंतरराष्ट्रीय एकदिवसीय सामना होता. सर्व ७ संघांनी महिला आंतरराष्ट्रीय एकदिवसीय पदार्पण केले.
विश्वचषक स्पर्धेतील सामने हे फक्त साखळी पद्धतीत खेळवले गेले. इंग्लंड महिला एकूण खेळलेल्या सहा सामन्यांमध्ये ५ जिंकत २० गुण घेऊन गुणफलकात अव्वल राहिल्याने पहिला वहिला महिला क्रिकेट विश्वचषक यजमान इंग्लंडने जिंकला. इंग्लंडच्या एनीड बेकवेल हीने स्पर्धेतील सर्वाधिक २६४ धावा बनविल्या तर यंग इंग्लंडच्या रोझलिंड हेग्स हिने सर्वाधिक १२ बळी घेतले.