ഠുമ്രി
From Wikipedia, the free encyclopedia
ഹിന്ദുസ്ഥാനി ശാസ്ത്രീയ സംഗീതരൂപമാണ് ഠുമ്രി. ഖയാൽ കഴിഞ്ഞാൽ ഹിന്ദുസ്ഥാനി സംഗീതത്തിൽ ഏറെ പ്രാധാന്യമുള്ള ഗാനശാഖ ഠുമ്രിയാണ്. വൈകാരികത, പ്രത്യേകിച്ച് ശൃംഗാരത്തിന് ആണ് ഇതിൽ പ്രാധാന്യം. ശൃംഗാരരതിഭാവങ്ങളുടെ ഉദാത്തവത്ക്കരിക്കപ്പെട്ട ഭാവങ്ങളാണ് ഇതിലൂടെ അവതരിപ്പിക്കാറുള്ളത്. രതികല്പനകളുടെ നിറപൂർണിമയാണ് ഇതിന്റെ ആത്മാവ്. ഗ്രാമ്യശൈലിയിൽ ഇതൾ വിരിയുന്ന അഗാധമായ വൈകാരികതയാണ് ഇതിന്റെ ഉടൽ. ഒട്ടു മിക്ക ഗാനങ്ങളും സ്ത്രീ കല്പിതങ്ങളെന്ന രീതിയിൽ രചിക്കപ്പെട്ടിട്ടുള്ളവയാണ്. അതുകൊണ്ടാണ്, പ്രണയപാരവശ്യങ്ങളും നിഷ്ക്കളങ്ക കലഹങ്ങളും സമ്മോഹനമായ അംഗചലനങ്ങളും വളകിലുക്കങ്ങളും കൊണ്ട് സമൃദ്ധമാണ് ഠുമ്രി എന്നു പറയാറുള്ളത്. പതിനേഴാം ശതകത്തിലെ ഡച്ചുചിത്രകാരന്മാരുടെ പ്രകൃതിദൃശ്യങ്ങളോട് ഠുമ്രിയുടെ ഭാവതലത്തെ ചില വിമർശകർ ഉപമിച്ചിട്ടുണ്ട്. ആദ്യകാല ഠുമ്രിയിലെ ഭാവാത്മകമായ വരികൾ പലതും ശ്രീകൃഷ്ണനും രാധയും തമ്മിലുണ്ടായിരുന്ന അനുരാഗത്തെയും പ്രണയത്തെയും പരാമർശിക്കുന്നതായിരുന്നു. അതിനോടൊപ്പം ഗ്രാമീണ മനുഷ്യരുടെ നിഷ്കളങ്ക പ്രണയവും ഠുമ്രിയിൽ തുളുമ്പി നിന്നു.[1]