![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/72/CIE_1931_Luminosity.png/640px-CIE_1931_Luminosity.png&w=640&q=50)
ഫോട്ടോപിക് കാഴ്ച
From Wikipedia, the free encyclopedia
പ്രകാശപൂരിതമായ (തിളക്കം 10 സിഡി/മീറ്റർ² മുതൽ 10 8 സിഡി/മീറ്റർ² വരെ) അവസ്ഥയിലെ കാഴ്ചയാണ് ഫോട്ടോപിക് കാഴ്ച എന്നറിയപ്പെടുന്നത്. മനുഷ്യരിലും മറ്റ് പല മൃഗങ്ങളിലും, റെറ്റിനയിലെ കോൺ കോശങ്ങൾ ഫോട്ടോപിക് ദർശനത്തിനോടൊപ്പം സ്കോട്ടോപിക് ദർശനത്തിലുള്ളതിനേക്കാൾ ഉയർന്ന കാഴ്ചയ്ക്കും (വിഷ്വൽ അക്വിറ്റി), വർണ്ണ ദർശനത്തിനും, ടെമ്പറൽ റെസല്യൂഷനും സഹായിക്കുന്നു.
![Thumb image](http://upload.wikimedia.org/wikipedia/commons/thumb/7/72/CIE_1931_Luminosity.png/640px-CIE_1931_Luminosity.png)
മനുഷ്യന്റെ കണ്ണിലെ മൂന്ന് തരം കോണുകൾ, മൂന്നു തരം നിറങ്ങൾ തിരിച്ചറിയാൻ സഹായിക്കുന്നു. കോണുകളുടെ ബയോളജിക്കൽ പിഗ്മെന്റുകൾക്ക് 420 നാ.മീ (നീല), 534 നാ.മീ (നീല-പച്ച), 564 നാ.മീ (മഞ്ഞ-പച്ച) തരംഗദൈർഘ്യങ്ങളിൽ പരമാവധി ആഗിരണ മൂല്യങ്ങളുണ്ട്. ദൃശ്യമാകുന്ന സ്പെക്ട്രത്തിൽ ഉടനീളം കാഴ്ച നൽകുന്നതിന് അവയുടെ സംവേദനക്ഷമത ശ്രേണികൾ ഓവർലാപ്പ് ചെയ്യുന്നുമുണ്ട്. 555 നാ.മീ (പച്ച) തരംഗദൈർഘ്യത്തിൽ, 683 ലൂമെൻ/വാട്ട് ആണ് പരമാവധി ലൂമിന്സ് എഫികസി.[1] നിർവചനം അനുസരിച്ച്, 5.4×1014 ഹെർട്സ് (λ = 555.17. . . nm) ആവൃത്തിയിലുള്ള പ്രകാശത്തിന് 683 ലൂമെൻ/വാട്ട് ലൂമിനസ് എഫികസി ഉണ്ട്.
ഒരു വ്യക്തി ഫോട്ടോപിക് ആയിരിക്കുമ്പോൾ, തരംഗദൈർഘ്യങ്ങൾക്കനുസരിച്ച് റെറ്റിനയിൽ പതിക്കുന്ന പ്രകാശത്തിന്റെ തീവ്രതയും വ്യത്യാസപ്പെടുന്നു. ഉദാഹരണത്തിന് നീല-പച്ച തരംഗദൈർഘ്യം (500 നാ.മീ) ആണെങ്കിൽ, പ്രകാശത്തിന്റെ 50% റെറ്റിനയുടെ ഇമേജ് പോയിന്റിൽ എത്തുന്നു.[2]
ഫോട്ടോപിക് ദർശനത്തിൽ അഡാപ്റ്റേഷൻ വളരെ വേഗതയുള്ളതാണ്; ഫോട്ടോപിക് കാഴ്ചയിയിലേക്കുള്ള അഡാപ്റ്റേഷൻ 5 മിനിറ്റിനുള്ളിൽ സംഭവിക്കാം, പക്ഷേ ഫോട്ടോപികിൽ നിന്ന് സ്കോട്ടോപികിലേക്ക് മാറാൻ 30 മിനിറ്റ് എടുക്കും.[2]
പ്രായം കൂടുന്നതിനനുസരിച്ച് ഫോട്ടോപിക് സ്പേഷ്യൽ കോൺട്രാസ്റ്റ് സെൻസിറ്റിവിറ്റി നഷ്ടപ്പെടും. എഴുപതുകളിലെത്തിയവർക്ക് ഉയർന്ന സ്പേഷ്യൽ ഫ്രീക്വൻസികൾ കണ്ടെത്തുന്നതിന് ഇരുപതുകളിലുള്ളവരേക്കാൾ ഏകദേശം മൂന്നിരട്ടി പ്രകാശ തീവ്രത ആവശ്യമാണ്.[3]
കുറഞ്ഞ വെളിച്ചത്തിൽ ഉള്ള കാഴ്ചയ്ക്ക്, മനുഷ്യ കണ്ണ് സ്കോട്ടോപിക് ദർശനം ഉപയോഗിക്കുന്നു (ലൂമിനൻസ് ലെവൽ 10 −6 മുതൽ 10 −3.5 cd /m2 വരെ), അതേപോലെ ഇന്റർമീഡിയറ്റ് അവസ്ഥയിൽ കണ്ണ് മെസോപിക് ദർശനവും ( ലൂമിനൻസ് ലെവൽ 10−3 മുതൽ 100.5 cd /m2 വരെ) ഉപയോഗിക്കുന്നു.