ഫുട്ബോൾ ലോകകപ്പ് 2006
From Wikipedia, the free encyclopedia
ഫുട്ബോൾ ലോകകപ്പ് 2006 (ഔദ്യോഗിക നാമം: 2006 ഫിഫ ലോകകപ്പ് - ജർമ്മനി) 2006 ജൂൺ 9 മുതൽ ജൂലൈ 9 വരെ ജർമ്മനിയിൽ അരങ്ങേറി. പെനാൽറ്റി ഷൂട്ടൌട്ടിൽ ഫ്രാൻസിനെ പരാജയപ്പെടുത്തി ഇറ്റലി പതിനെട്ടാമത് ലോകകപ്പ് ജേതാക്കളായി. ഇറ്റലിയുടെ ആന്ദ്രേ പിർലോ ഫൈനലിൽ മാൻ ഓഫ് ദി മാച്ചായി. ആറു വൻകരകളിലെ 198 രാജ്യങ്ങൾ പലഘട്ടങ്ങളിലായി മത്സരിച്ചാണ് ലോകകപ്പ് ഫൈനൽ റൌണ്ടിലേക്കുള്ള 32 ടീമുകളെ തെരഞ്ഞെടുത്തത്. ഈ ടീമുകളെ എട്ടു ഗ്രൂപ്പുകളിലായി തിരിക്കുന്നതിനുള്ള നറുക്കെടുപ്പ് 2005 ഡിസംബർ 9-ന് ജർമ്മനിയിൽ നടന്നു.
![Thumb image](http://upload.wikimedia.org/wikipedia/commons/thumb/9/94/Teamgeist_Ball_World_Cup_2006.jpg/320px-Teamgeist_Ball_World_Cup_2006.jpg)
ലോകകപ്പിന്റെ ആതിഥേയത്വം വഹിക്കാൻ ജർമ്മനിക്ക് രണ്ടാം തവണയാണ് ഭാഗ്യം ലഭിച്ചത്. മെക്സിക്കോ, ഇറ്റലി, ഫ്രാൻസ് എന്നീരാജ്യങ്ങൾക്ക് ശേഷം ലോകകപ്പിന് രണ്ടാംതവണ ആതിഥേയത്വമരുളാൻ ഭാഗ്യം ലഭിച്ച രാജ്യമായി ജർമ്മനി. 1974- ലെ ലോകകപ്പ് ജർമ്മനിയിലാണ് അരങ്ങേറിയത്. ഇതിന് പുറമേ1936-ൽ ബെർലിനിൽ വെച്ചും1972-ൽ മ്യൂനിച്ചിൽ വച്ചും ഒളിംപിക്സ് മത്സരങ്ങൾ ജർമനിയിൽ അരങ്ങേറിയിട്ടുണ്ട്.
2006 ലെ ലോകകപ്പ് ജർമനിയിലേക്ക് കൊണ്ടുവരാൻ നിതാന്തപരിശ്രമങ്ങൾ നടത്തിയ പ്രമുഖരിൽ ഫ്രാൻസ് ബെക്കൻ ബോവർ, റൂഡി വോളർ, കാൾ ഹൈൻസ് റുമനീഗെ തുടങ്ങിയ ഫുട്ബോൾ താരങ്ങളും, ടെന്നീസ് താരം ബോറിസ് ബെക്കർ, സൂപ്പർ മോഡൽ ക്ലോഡിയ ഷിഫർ, ജർമൻ ചാൻസലറായിരുന്ന ജെർഹാർഡ് ഷ്രോഡർ എന്നിവരുമുൾപ്പെടുന്നു.
ആകെ 64 മത്സരങ്ങളാണ് ഈ ലോകകപ്പിൽ അരങ്ങേറിയത്. 32 ടീമുകളെ എട്ടു ഗ്രൂപ്പുകളിലായി തിരിച്ചുള്ള പ്രാഥമിക ഘട്ടത്തിനുശേഷം ഓരോ ഗ്രൂപ്പിലെയും ആദ്യ രണ്ടു സ്ഥാനക്കാർ അണിനിരന്ന പ്രീ ക്വാർട്ടർ ഫൈനൽ ജൂൺ 24ന് ആരംഭിച്ചു. പ്രീ ക്വാർട്ടർ, ക്വാർട്ടർ ഘട്ടങ്ങൾക്കു ശേഷം നടന്ന സെമി ഫൈനലിൽ ആതിഥിയേരായ ജർമ്മനി, ഇറ്റലി, ഫ്രാൻസ്, പോർച്ചുഗൽ എന്നിവർ മത്സരിച്ചു. 1982-ലെ സ്പെയിൻ ലോകകപ്പിനുശേഷം ആദ്യമായാണ് നാലു യൂറോപ്യൻ രാജ്യങ്ങൾ അവസാന നാലിലെത്തിയത്. ആദ്യ സെമിഫൈനലിൽ ഇറ്റലി ആതിഥേയരായ ജർമ്മനിയെയും രണ്ടാം സെമിഫൈനലിൽ ഫ്രാൻസ് പോർച്ചുഗലിനെയും കീഴടക്കി ഫൈനലിലെത്തി.