പിയേർ ദൈയി
From Wikipedia, the free encyclopedia
ഫ്രഞ്ച് തത്ത്വചിന്തകനും വൈദികനുമായിരുന്നു പിയേർ ദൈയി. 1380-ൽ സോർബോണിൽ നിന്ന് ഡോക്ടറേറ്റ് നേടിയ ഇദ്ദേഹം 1389-ൽ പാരിസ് സർവ്വകലാശാലയുടെ ചാൻസലറായി നിയമിതനായി. 1395-ൽ ബിഷപ്പായി അവരോധിക്കപ്പെട്ടു. 1411-ൽ കർദിനാൾസ്ഥാനം ലഭിച്ചു. കൺസിലിയർവാദത്തിന്റെ (കത്തോലിക്കാസഭയിലെ പരമാധികാരം സഭയുടെ പേരിൽ പ്രവർത്തിക്കുന്ന ഒരു കൌൺസിലിൽ നിക്ഷിപ്തമാണെന്നും മാർപാപ്പയുടെ പ്രവർത്തനം തൃപ്തികരമല്ലെങ്കിൽ അദ്ദേഹത്തെ പുറത്താക്കാൻ കൗൺസിലിന് അധികാരമുണ്ടെന്നുമുള്ള വാദം) വക്താവായിരുന്ന ദൈയിയും ശിഷ്യനായ ഗെർസണും 1414-18-ലെ കോൺസ്റ്റൻസ് കൌൺസിലിൽ പ്രധാന പങ്കു വഹിച്ചു. മൈർകോർട്ടിലെ ജോണിന്റെ (John of Mirecourt) നാമമാത്രവാദം ഇദ്ദേഹത്തെ ഗണ്യമായി സ്വാധീനിക്കുകയുണ്ടായി. ജ്യോതിഷത്തിന് ചരിത്രവും ദൈവശാസ്ത്രവുമായുള്ള ബന്ധം പഠനവിധേയമാക്കിയ ഇദ്ദേഹം 1414-ൽ പ്രസിദ്ധീകരിച്ച ട്രാക്ടേറ്റസ് ദ കോൺകോർഡിയ അസ്ട്രൊനൊമിക്കെ (Tractatus de Concordia astronomicae) എന്ന കൃതിയിൽ 1789-ലെ ഫ്രഞ്ച് വിപ്ലവത്തെക്കുറിച്ച് പ്രവചിച്ചിട്ടുണ്ട്. ബൊയെതിയസ്, പീറ്റർ ലൊംബാർഡ് തുടങ്ങിയവരുടെ കൃതികൾക്ക് ഇദ്ദേഹം വ്യാഖ്യാനങ്ങൾ തയ്യാറാക്കി.