ഡെഡാലസ്
From Wikipedia, the free encyclopedia
ഗ്രീക്ക് ഐതിഹ്യത്തിൽ പരാമൃഷ്ടനായ കലാകാരനാണ് ഡെഡാലസ്. ഇദ്ദേഹം എല്ലാ കലാകാരന്മാരുടേയും ശില്പികളുടേയും രക്ഷാധികാരിയായി വർത്തിക്കുന്നു എന്നാണു സങ്കല്പം. മരപ്പണിയുടെയും, മഴു, തോലുളി തുടങ്ങിയ ഉപകരണങ്ങളുടെയും ഉപജ്ഞാതാവ് ഇദ്ദേഹമാണെന്നാണ് ഗ്രീക്കു വിശ്വാസം. കലാകാരനെന്ന നിലയിൽ ഡെഡാലസ് അദ്വിതീയനായിരുന്നു. മനുഷ്യനെ തുറന്ന മിഴികളോടെയും, ചലനത്തെ സൂചിപ്പിക്കുന്ന പാദങ്ങളോടെയും ചിത്രീകരിച്ചത് ഇദ്ദേഹമാണ്. ആഫ്രോഡൈറ്റ് ക്ഷേത്രത്തിനു വേണ്ടി ഡെഡാലസ് നിർമിച്ച സുവർണമധുകോശം (golden honeycont) ലോഹപ്പണിയിൽ ഇദ്ദേഹത്തിനുള്ള നിർമ്മാണകലാവൈഭവത്തിനു നിദർശനമായി നിലകൊള്ളുന്നു.