ചായം പൂശിയ മത്സ്യം
From Wikipedia, the free encyclopedia
ചായം പൂശിയ മത്സം, ഉപഭോക്താക്കളെ ആകർഷിക്കുവാൻ കൃത്രിമമായി വർണ്ണം നൽകിയ അലങ്കാര അക്വേറിയം മത്സ്യങ്ങളാണ്. ജ്യൂസിംഗ് എന്നുകൂടി അറിയപ്പെടുന്ന ഈ ചായം പൂശൽ നിരവധി മാർഗ്ഗങ്ങളിലൂടെയാണു കൈവരിക്കുന്നത്. തിളങ്ങുന്ന ഫ്ലൂറസന്റ് വർണ്ണച്ചായം നിറച്ച സിറിഞ്ച് ഉപയോഗിച്ച് മത്സ്യത്തിന്റെ ചർമ്മത്തിനടിയിൽ കുത്തിവയ്ക്കുക, ചായക്കൂട്ടിലേയ്ക്ക് മത്സ്യത്തെ മുക്കിയെടുക്കുക അല്ലെങ്കിൽ മത്സ്യത്തിനു നിറമുള്ള ആഹാരം നൽകുക എന്നിങ്ങനെ നിരവധി മാർഗ്ഗങ്ങൾ ഇതിനായി ഉപയോഗപ്പെടുത്തുന്നു.
ഈ വിവാദ പ്രക്രിയ സാധാരണയായി മീനുകൾക്ക് തിളക്കമാർന്ന വർണ്ണം ഉണ്ടാക്കാനും ഉപഭോക്താക്കൾക്ക് അവയെ കൂടുതൽ ആകർഷകമായി തോന്നുന്നതിനും വേണ്ടിയാണ് ചെയ്യാറുള്ളത്. ഇങ്ങനെ നൽകുന്ന മത്സ്യത്തിൻറെ നിറം ശാശ്വതമായി നിലനിൽക്കുന്നില്ല. സാധാരണയായി ആറു മുതൽ ഒമ്പത് മാസത്തിനുള്ളിൽ ഈ കൃത്രിമ നിറം മങ്ങിപ്പോകുന്നു.