![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/e6/Bernard_of_Clairvaux_-_Gutenburg_-_13206.jpg/640px-Bernard_of_Clairvaux_-_Gutenburg_-_13206.jpg&w=640&q=50)
ക്ലെയർവോയിലെ ബെർണർദീനോസ്
From Wikipedia, the free encyclopedia
പന്ത്രണ്ടാം നൂറ്റാണ്ടിലെ (ജനനം 1090, മരണം 1153 ആഗസ്ത് 20) ഒരു ഫ്രെഞ്ച് ആശ്രമാധിപനും നവീകൃത സിസ്റ്റേഴ്സ്യൻ സമൂഹത്തിന്റെ മുഖ്യസ്ഥാപകനുമാണ് ക്ലെയർവോയിലെ ബെർണർദീനോസ് അഥവാ വിശുദ്ധ ബെർണാർഡ്. പത്തൊൻപതാം വയസ്സിൽ അമ്മയുടെ മരണത്തെ തുടർന്ന് ബെർണദീനോസ് സിസ്റ്റേർഷ്യൻ സഭയിൽ അംഗത്വം നേടി. മൂന്നുവർഷത്തിനു ശേഷം പുതിയതായി കാടുവെട്ടിത്തെളിച്ചുണ്ടാക്കിയ വാൾ ദെ അബ്സിന്തെ എന്ന ഒറ്റപ്പെട്ട പ്രദേശത്ത് ഒരു പുതിയ ആശ്രമം സ്ഥാപിക്കാൻ അദ്ദേഹം നിയുക്തനായി. 1115 ജൂൺ 25-ന് അദ്ദേഹം ഈ ആശ്രമം സ്ഥാപിച്ചെന്നും അതിന് ക്ലെയർവാലി എന്നു പേരിട്ടെന്നും പാരമ്പര്യം പറയുന്നു. കാലക്രമേണ ആ സ്ഥലനാമം 'ക്ലെയർവോ' ആയി പരിണമിക്കുകയും ബെർണാർദിന്റെ പേരുമായി പിൽക്കാലമത്രയും ബന്ധപ്പെട്ടിരിക്കുകയും ചെയ്തു. തുടർന്ന് വിശ്വാസപ്രഘോഷണത്തിലേർപ്പെട്ട അദ്ദേഹം വിശുദ്ധമറിയത്തോടുള്ള ഭക്തി പ്രചരിപ്പിക്കുന്നതിൽ പ്രത്യേകം ശ്രദ്ധിച്ചു. [1]
![Thumb image](http://upload.wikimedia.org/wikipedia/commons/thumb/e/e6/Bernard_of_Clairvaux_-_Gutenburg_-_13206.jpg/640px-Bernard_of_Clairvaux_-_Gutenburg_-_13206.jpg)
1128-ൽ ട്രോയെസിലെ സഭാസമ്മേളനത്തിൽ സംബന്ധിച്ച ബെർണർദീനോസ് അവിടെ ടെംപ്ലാർ മാടമ്പികൾ(Knights Templar) എന്ന ക്രൈസ്തവരണശൂരസംഘത്തിന്റെ ആശയം അവതരിപ്പിച്ചു. കാലക്രമേണ വളർന്നുവികസിച്ച ഈ സംഘം, ഏറെ രാഷ്ട്രീയ പ്രാധാന്യമുള്ള ഒരു വിഭാഗമായി വളർന്നു.