![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/eb/Calvin-cycle4_ml.svg/langml-640px-Calvin-cycle4_ml.svg.png&w=640&q=50)
കാൽവിൻ ചക്രം
From Wikipedia, the free encyclopedia
സൂര്യപ്രകാശത്തിന്റെ സഹായത്താൽ അന്തരീക്ഷത്തിലെ കാർബൺ ഡയോക്സൈഡ്, വേരുകളിലൂടെയും (ചിലപ്പോൾ കാണ്ഡത്തിലൂടെയും) ആഗിരണം ചെയ്തു ലഭിക്കുന്ന ജലം എന്നിവയെ വിഘടിപ്പിച്ച് ഊർജ്ജവും ഓക്സിജനും അന്നജവും മറ്റുമാക്കിത്തീർക്കുന്ന പ്രക്രിയയാണു് പ്രകാശസംശ്ലേഷണം. ഈ സങ്കീർണ്ണമായ പ്രക്രിയയുടെ രാസപരമായ മാറ്റങ്ങളിലെ ഒരു പ്രധാന ഘട്ടം വിശദീകരിക്കുന്ന രാസചക്രമാണു് കാൽവിൻ ചക്രം അഥവാ കാൽവിൻ സൈക്കിൾ. കാൽവിൻ-ബെൻസൺ-ബഷാം സൈക്കിൾ (Calvin–Benson-Bassham [CBB] cycle, നിരോക്സീകാരക പെന്റോസ് ഫോസ്ഫേറ്റ് സൈക്കിൾ (reductive pentose phosphate cycle), സി-3 സൈക്കിൾ (C3 cycle) എന്നിങ്ങനേയും ഇതിനു പേരുണ്ടു്.
![Thumb image](http://upload.wikimedia.org/wikipedia/commons/thumb/e/eb/Calvin-cycle4_ml.svg/640px-Calvin-cycle4_ml.svg.png)
ഈ സുപ്രധാനമായ ജൈവരാസപ്രവർത്തനം പ്രധാനമായും ഒരു ഓക്സീകരണ-നിരോക്സീകരണചക്രമാണു്. പ്രകാശകിരണങ്ങളുടെ ആവശ്യമില്ലാത്ത ഇരുണ്ട രാസപ്രവർത്തനങ്ങൾ (dark reaction) എന്ന വിഭാഗത്തിലാണു് ഈ പ്രവർത്തനചക്രത്തെ ജൈവരസതന്ത്രജ്ഞർ ഉൾപ്പെടുത്തിയിരിക്കുന്നതു്. എന്നാൽ പ്രകാശോർജ്ജത്തിന്റെ ആദ്യഘട്ടത്തിനുശേഷം ഒരു താൽക്കാലികരൂപമാക്കി മാറ്റപ്പെട്ട രാസോർജ്ജവും അതുൾക്കൊള്ളുന്ന പദാർത്ഥവും ആധാരമാക്കിയാണു് കാൽവിൻ സൈക്കിൾ ചംക്രമണം നടത്തുന്നതു്. അതിനാൽ വെളിച്ചത്തിന്റെ സാന്നിദ്ധ്യത്തിൽ നടക്കുന്ന ഒരു 'ഇരുണ്ട രാസപ്രവർത്തനം'എന്നു പറയുന്നതാവും കൂടുതൽ ശരി.