![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/cf/Casio_calculator_JS-20WK_in_201901_002.jpg/640px-Casio_calculator_JS-20WK_in_201901_002.jpg&w=640&q=50)
കാൽക്കുലേറ്റർ
From Wikipedia, the free encyclopedia
സംഖ്യകൾ തമ്മിലുള്ള കൂട്ടലും കുറയ്ക്കലും പോലെയുള്ള അടിസ്ഥാന കണക്കുകൂട്ടലുകൾ മുതൽ സങ്കീർണ്ണമായ ഗണിത ക്രിയകൾ വരെയുള്ള കണക്കുകൂട്ടലുകൾ നടത്താൻ ഉപയോഗിക്കുന്ന ഒരു കൊണ്ടു നടക്കാവുന്ന ഇലക്ട്രോണിക് ഉപകരണമാണ് ഇലക്ട്രോണിക് കാൽക്കുലേറ്റർ.
![Thumb image](http://upload.wikimedia.org/wikipedia/commons/thumb/c/cf/Casio_calculator_JS-20WK_in_201901_002.jpg/640px-Casio_calculator_JS-20WK_in_201901_002.jpg)
![Thumb image](http://upload.wikimedia.org/wikipedia/commons/1/18/Casio_fx-991EX.png)
ആദ്യത്തെ സോളിഡ്-സ്റ്റേറ്റ് ഇലക്ട്രോണിക് കാൽക്കുലേറ്റർ 1960 കളുടെ തുടക്കത്തിൽ സൃഷ്ടിക്കപ്പെട്ടു. ജാപ്പനീസ് കാൽക്കുലേറ്റർ കമ്പനിയായ ബുസികോമിനായി ഇന്റൽ വികസിപ്പിച്ച ആദ്യത്തെ മൈക്രോപ്രൊസസ്സറായ ഇന്റൽ 4004 പുറത്തിറങ്ങിയ ശേഷം 1970-കളിൽ പോക്കറ്റ് വലുപ്പത്തിലുള്ള ഉപകരണങ്ങൾ ലഭ്യമായിത്തുടങ്ങി.
ആധുനിക ഇലക്ട്രോണിക് കാൽക്കുലേറ്ററുകൾ വിലകുറഞ്ഞതും ക്രെഡിറ്റ് കാർഡ് വലുപ്പമുള്ളതുമായ മോഡലുകൾ മുതൽ അന്തർനിർമ്മിത പ്രിന്ററുകളുള്ള ദൃഢമായ ഡെസ്ക്ടോപ്പ് മോഡലുകൾ വരെയായി വ്യത്യാസപ്പെടുന്നു. ഇന്റഗ്രേറ്റഡ് സർക്യൂട്ടുകളുടെ സംയോജനം അവയുടെ വലുപ്പവും വിലയും കുറച്ചതിനാൽ 1970-കളുടെ മധ്യത്തിൽ അവ ജനപ്രിയമായി. ആ ദശാബ്ദത്തിന്റെ അവസാനത്തോടെ, അടിസ്ഥാന കാൽക്കുലേറ്റർ വില കുറഞ്ഞു വന്ന് മിക്കവർക്കും താങ്ങാവുന്ന നിലയിലേക്ക് എത്തുകയും അത് സ്കൂളുകളിൽ ഉൾപ്പടെ സാധാരണമാവുകയും ചെയ്തു.
യുണിക്സിന്റെ ആദ്യകാലങ്ങളിൽ തന്നെ കമ്പ്യൂട്ടർ ഓപ്പറേറ്റിംഗ് സിസ്റ്റങ്ങളിൽ ഡിസി, എച്ച്ഒസി പോലുള്ള ഇന്ററാക്ടീവ് കാൽക്കുലേറ്റർ പ്രോഗ്രാമുകൾ ഉൾപ്പെടുത്തിയിട്ടുണ്ട്, കൂടാതെ കാൽക്കുലേറ്റർ ഫംഗ്ഷനുകൾ മിക്കവാറും എല്ലാ പേഴ്സണൽ ഡിജിറ്റൽ അസിസ്റ്റന്റ് (പിഡിഎ) തരത്തിലുള്ള ഉപകരണങ്ങളിലും ഉൾപ്പെടുത്തിയിട്ടുണ്ട്.
പൊതുവായ ഉദ്ദേശ്യങ്ങൾ നിർവ്വഹിക്കാനുള്ള കാൽക്കുലേറ്ററുകൾക്ക് പുറമേ, പ്രത്യേക വിപണികൾക്കായി രൂപകൽപ്പന ചെയ്തവയും ഉണ്ട്. ഉദാഹരണത്തിന്, ത്രികോണമിതിയും സ്ഥിതിവിവരക്കണക്കുകളും ഉൾപ്പെടുന്ന സയന്റിഫിക് കാൽക്കുലേറ്ററുകൾ. ചില കാൽക്കുലേറ്ററുകൾക്ക് കമ്പ്യൂട്ടർ ബീജഗണിതം ചെയ്യാനുള്ള കഴിവുണ്ട്. ഗ്രാഫിംഗ് കാൽക്കുലേറ്ററുകൾ റിയൽ ലൈനിൽ നിർവചിച്ചിരിക്കുന്ന ഗ്രാഫ് ഫംഗ്ഷനുകൾ, അല്ലെങ്കിൽ ഉയർന്ന അളവിലുള്ള യൂക്ലിഡിയൻ സ്പേസ് കൾക്കായി ഉപയോഗിക്കാം. അടിസ്ഥാന കാൽക്കുലേറ്ററുകൾക്ക് ചിലവ് കുറവാണ്, എന്നാൽ ശാസ്ത്രീയവും ഗ്രാഫിംഗ് മോഡലുകളും കൂടുതൽ ചിലവേറിയതാണ്.
സ്മാർട്ട്ഫോണുകൾ, ടാബ്ലെറ്റ് കമ്പ്യൂട്ടറുകൾ, പേഴ്സണൽ കമ്പ്യൂട്ടറുകൾ എന്നിവയുടെ വിപുലമായ ലഭ്യതയിൽ പോലും, പൊതു ഉപയോഗത്തിലുള്ള സാധാരണ ഹാർഡ്വെയർ കാൽക്കുലേറ്ററുകൾ ഇപ്പോഴും വ്യാപകമായി ഉപയോഗിക്കപ്പെടുന്നു. എന്നിരുന്നാലും അവയുടെ ഉപയോഗം മുമ്പത്തേതിനേക്കാൾ കുറവാണ്.