ഉദ്ധാരണം
From Wikipedia, the free encyclopedia
ലിംഗം (penis) രക്തം നിറഞ്ഞു ദൃഢമാവുന്ന ഒരു ശാരീരിക പ്രതിഭാസമാണ് ഉദ്ധാരണം എന്നറിയപ്പെടുന്നത്. ഇംഗ്ലീഷിൽ 'ഇറക്ഷൻ (Erection)' എന്ന് പറയപ്പെടുന്നു. മനഃശാസ്ത്രവിഷയകവും, സിരാവിഷയകവും ധമനീവിഷയകവുമായ ഒരു സങ്കീർണ്ണമായ പരസ്പര പ്രവർത്തനം മൂലമാണ് ഉദ്ധാരണം സംഭവിക്കുന്നതെങ്കിലും, ഇത് പുരുഷ ലൈംഗികതയുമായി വളരെ അധികം ബന്ധപ്പെട്ടിരിക്കുന്നു. അതുകൊണ്ട് തന്നെ തലച്ചോർ, ഹൃദയം എന്നി സുപ്രധാന അവയവങ്ങളുടെ പ്രവർത്തനഫലമായിട്ടാണ് ഉദ്ധാരണം നടക്കുന്നതെന്ന് പറയാം. ഉദ്ധാരണം പുരുഷന്മാരിലെ ലൈംഗിക ഉത്തേജനത്തിന്റെ ഒരു പ്രധാന ലക്ഷണവും ലൈംഗിക സംതൃപ്തിക്ക് വളരെ അത്യാവശ്യവും കൂടിയാണിത്. മത്തിഷ്ക്കത്തിലെ ലൈംഗിക ഉത്തേജനമാണ് ഇതിന്റെ മൂല കാരണം. അതോടൊപ്പം ലിംഗാഗ്രത്തിൽ ചെറിയ തോതിൽ വഴുവഴുപ്പുള്ള സ്നേഹദ്രവവും ഉണ്ടാകാറുണ്ട്. ഇതിനു പുറമേ, മൂത്രസഞ്ചി നിറയുമ്പോഴും ഉദ്ധാരണം സംഭവിക്കാറുണ്ട്. ചില പുരുഷന്മാരിൽ, ഏതു സമയത്തും, സ്വമേധയാ ഉദ്ധാരണം നടക്കുമ്പോൾ, ചിലരിൽ ഇത് ഉറങ്ങുന്ന സമയത്തും അതിരാവിലെയും സംഭവിക്കുന്നു. ലിംഗോദ്ധാരണം മാനസികവും ശാരീരികവുമായി ആരോഗ്യമുള്ള പുരുഷനിൽ നടക്കുന്ന സ്വാഭാവികമായ ഒരു പ്രവർത്തനം മാത്രമാണ്. ആരോഗ്യമുള്ള പ്രായപൂർത്തിയായ പുരുഷന്മാരിൽ ഉറക്കത്തിൽ ഉദ്ധാരണവും സ്ഖലനവും നടക്കുന്നത് സ്വാഭാവികമാണ്. മത്തിഷ്ക്കവും, നാഡീ ഞരമ്പുകളും, ഹോർമോണുകളും, ഹൃദയവും ഇതിൽ കൃത്യമായ പങ്കു വഹിക്കുന്നു. സ്ഖലനത്തോടെ ഉദ്ധാരണം അവസാനിക്കുന്നു. അതോടെ കോടിക്കണക്കിനു ബീജങ്ങൾ അടങ്ങിയ ശുക്ലദ്രാവകം ശക്തിയായി പുറത്തേക്ക് പോകുന്നു അഥവാ യോനിയിലേക്ക് നിക്ഷേപിക്കപ്പെടുന്നു. സ്ഖലനശേഷം പുരുഷന്മാരിൽ പ്രൊലാക്ടിൻ എന്ന ഹോർമോണിന്റെ ഉത്പാദനം താത്കാലികമായി വർധിക്കുന്നു. അത് പുരുഷന്മാരെ വിശ്രാന്തിയിലേക്ക് നയിക്കുന്നു. ചില ആളുകൾക്ക് ഇതൊരു ക്ഷീണം പോലെ അനുഭവപ്പെടാറുണ്ട്. മാനസികമോ ശാരീരികമോ ആയ കാരണങ്ങൾകൊണ്ട് ഉദ്ധാരണം ഉണ്ടാകാത്ത അവസ്ഥയെ "ഉദ്ധാരണശേഷിക്കുറവ് (Erectile dysfunction)" എന്ന് വിളിക്കുന്നു. എന്നിരുന്നാലും വയാഗ്ര പോലെയുള്ള മരുന്നുകളുടെ കണ്ടുപിടുത്തം ഇക്കാര്യത്തിൽ ഗുണപരമായ മാറ്റങ്ങൾ വരുത്തിയിട്ടുണ്ട്. ആരോഗ്യകരമായ ജീവിതശൈലി പ്രത്യേകിച്ച്, പോഷസമൃദ്ധമായ ഭക്ഷണം, ചിട്ടയായ വ്യായാമം, ആവശ്യത്തിന് ഉറക്കം, സന്തോഷകരമായ മാനസികാവസ്ഥ, മാനസിക സമ്മർദം നിയന്ത്രിക്കുക, ഉല്ലാസ വേളകൾ കണ്ടെത്തുക എന്നിവ ഉദ്ധാരണശേഷി നല്ലരീതിയിൽ നിലനിർത്തുന്നതിന് സഹായിക്കുന്നു. പ്രത്യേകിച്ച് ഓട്ടം, വേഗത്തിലുള്ള നടത്തം, പടികൾ കയറൽ പോലെയുള്ള വ്യായാമങ്ങൾ ശീലിക്കുന്നത് ആരോഗ്യത്തിനും ഉദ്ധാരണശേഷിക്കും ഏറെ നല്ലതാണ്. അതിമദ്യപാനം, പുകവലി, അമിത മാനസിക സമ്മർദ്ദം, പങ്കാളിയോടുള്ള താൽപര്യക്കുറവ്, വിഷാദം, അമിതമായി ഉപ്പും, കൊഴുപ്പും, മധുരവും അടങ്ങിയ ആഹാരം, പോഷകാഹാരക്കുറവ്, ഉറക്കക്കുറവ്, ആൻഡ്രോപോസ് എന്നിവയൊക്കെ ഉദ്ധാരണശേഷിയെ മോശമായി ബാധിക്കുന്ന ഘടകങ്ങളാണ്. സാമാന്യം ആരോഗ്യമുള്ള ഏതൊരു പുരുഷനും ഏത് പ്രായത്തിലും ഉദ്ധാരണം ഉണ്ടാകാറുണ്ട്. വാർധക്യത്തിൽ അതിന് അല്പം കൂടി സമയം എടുത്തെന്നു വരാം. ശരീരത്തിന്റെ സ്വാഭാവികമായ പ്രവർത്തനങ്ങൾ ഏത് പ്രായത്തിലും നിലനിർത്തുക എന്നത് തന്നെയാണ് ആരോഗ്യത്തിന് അഭികാമ്യം[1][2][3].
വിക്കിപീഡിയ സെൻസർ ചെയ്തിട്ടില്ല. ഈ ലേഖനം കൈകാര്യം ചെയ്യുന്ന വിഷയം സമ്പൂർണ്ണമായി പ്രതിപാദിക്കുന്നതിന് ആവശ്യമായ വിവരങ്ങളോ ചിത്രങ്ങളോ ചിലർക്ക് അപ്രിയകരമോ എതിർപ്പുണ്ടാക്കുന്നതോ ആകാം.
ഒരു താളിലെ ചിത്രങ്ങൾ മറയ്ക്കുന്നതിന് സഹായം:ഒരു ചിത്രം എങ്ങനെ മറയ്ക്കാം നോക്കുക. |