ആഗ്നസ് മൂർഹെഡ്
അമേരിക്കൻ ചലചിത്ര നടൻ / From Wikipedia, the free encyclopedia
ആഗ്നസ് റോബർട്ട്സൺ മൂർഹെഡ് (ജീവിതകാലം: ഡിസംബർ 6, 1900 - ഏപ്രിൽ 30, 1974) ഒരു അമേരിക്കൻ അഭിനേത്രിയായിരുന്നു. 41 വർഷം നീണ്ടുനിന്ന തന്റെ തൊഴിൽ ജീവിതത്തിനിടയിൽ റേഡിയോ, നാടക, സിനിമ, ടെലിവിഷൻ എന്നിങ്ങനെ വിവിധ മേഖലകളിൽ അവർ ജോലി ചെയ്തിരുന്നു.[1] ബെവിച്ഡ് എന്ന ടെലിവിഷൻ പരമ്പരയിലെ എൻഡോറ എന്ന കഥാപാത്രത്തിലൂടെ കൂടുതലായി അറിയപ്പെടുന്ന അവർ, സിറ്റിസൺ കെയ്ൻ, ദി മാഗ്നിഫിസന്റ് ആംബേഴ്സൺസ്, ഡാർക്ക് പാസേജ്, ഓൾ ദാറ്റ് ഹെവൻ അലവ്സ്, ഷോ ബോട്ട്, ഹഷ് ... ഹഷ്, സ്വീറ്റ് ഷാർലറ്റ് തുടങ്ങിയ സിനിമകളിലും ശ്രദ്ധേയമായ വേഷങ്ങൾ അവതരിപ്പിച്ചിട്ടുണ്ട്.
മൂർഹെഡ് അപൂർവമായി മാത്രമേ പ്രധാന വേഷങ്ങൾ കൈകാര്യം ചെയ്തിരുന്നുള്ളുവെങ്കിൽപ്പോലും കഥാപാത്ര വികസനത്തിലും ഭാവാഭിനയത്തിന്റെ പരമോന്നതിയിലേയ്ക്കെത്താനുമുള്ള അവരുടെ മികവ് നാല് അക്കാദമി അവാർഡ് നാമനിർദ്ദേശങ്ങൾ, ആറ് എമ്മി അവാർഡ് നാമനിർദ്ദേശങ്ങൾ എന്നിവ കൂടാതെ ഒരു പ്രൈംടൈം എമ്മി അവാർഡ്, രണ്ട് ഗോൾഡൻ ഗ്ലോബ് പുരസ്കാരം എന്നിവയും നേടുന്നതിനു സഹായകമായി. ഓസ്കാർ ചടങ്ങിന് ആതിഥേയത്വം വഹിച്ച ആദ്യ വനിതയായിരുന്നു അവർ. ടെലിവിഷനിലേക്കുള്ള അവരുടെ ചുവടുമാറ്റത്തോടെ നാടകീയതക്കും ഹാസ്യത്തിനും പ്രശംസ നേടുന്നതിനു സാധിച്ചു. അത്യന്ത്യം വ്യത്യസ്ഥമായ കഥാപാത്രങ്ങളെ അവതിരിപ്പിക്കാനാവുമായിരുന്നെങ്കിലും പലപ്പോഴും ധിക്കാരവും ധാർഷ്ട്യവുമുള്ള കഥാപാത്രങ്ങളെയാണ് അവർ അവതരിപ്പിച്ചിരുന്നത്.