അൾട്രാസൗണ്ട്
From Wikipedia, the free encyclopedia
മനുഷ്യന്റെ കേൾവിയുടെ ഉയർന്ന ശ്രവണ പരിധിയേക്കാൾ ഉയർന്ന ആവൃത്തിയിലുള്ള ശബ്ദ തരംഗങ്ങളാണ് അൾട്രാസൗണ്ട് എന്ന് അറിയപ്പെടുന്നത്. മനുഷ്യർക്ക് അത് കേൾക്കാൻ കഴിയില്ല എന്നതൊഴിച്ചാൽ, ഭൗതിക ഗുണങ്ങളിൽ "സാധാരണ" (കേൾക്കാവുന്ന) ശബ്ദത്തിൽ നിന്ന് അൾട്രാസൗണ്ട് വ്യത്യസ്തമല്ല. ഈ പരിധി ഓരോ വ്യക്തിക്കും വ്യത്യാസപ്പെടുന്നു. ആരോഗ്യമുള്ള യുവാക്കളിൽ ഇത് ഏകദേശം 20 കിലോഹെർട്സ് (20,000 ഹെർട്സ്) ആണ്. അൾട്രാസൗണ്ട് ഉപകരണങ്ങൾ 20 കി. ഹെർട്ട്സ് മുതൽ നിരവധി ജിഗാഹെർട്സ് വരെ ആവൃത്തിയിൽ പ്രവർത്തിക്കുന്നു.
അൾട്രാസൗണ്ട് വിവിധ മേഖലകളിൽ ഉപയോഗിക്കുന്നു. വസ്തുക്കളെ കണ്ടെത്താനും ദൂരം അളക്കാനും അൾട്രാസോണിക് ഉപകരണങ്ങൾ ഉപയോഗിക്കുന്നു. മനുഷ്യശരീരത്തിലെ അവയവങ്ങളുടെ അൾട്രാസൗണ്ട് ഇമേജിംഗ് അല്ലെങ്കിൽ സോണോഗ്രാഫി പലപ്പോഴും വൈദ്യശാസ്ത്രത്തിൽ ഉപയോഗിക്കുന്നു.നാശരഹിതമായ പരിശോധനയിലൂടെ (Non Destructive Testing) ഉൽപ്പന്നങ്ങളുടെയും ഘടനകളുടെയും കുറവുകളും കേടുകളും കണ്ടെത്തുന്നതിന് അൾട്രാസൗണ്ട് ഉപയോഗിക്കുന്നു. വ്യാവസായിക മേഖലയിൽ ഉപകരണങ്ങൾ വൃത്തിയാക്കുന്നതിനും, ചേരുവകൾ നന്നായി കൂട്ടിയോജിപ്പിച്ച് മിശ്രിതമാക്കുന്നതിനും കെമിക്കൽ പ്രക്രിയകൾ ത്വരിതപ്പെടുത്തുന്നതിനും അൾട്രാസൗണ്ട് ഉപയോഗിക്കുന്നു. വവ്വാലുകളും പോർപോയിസുകളും പോലുള്ള മൃഗങ്ങൾ ഇരയെയും തടസ്സങ്ങളെയും കണ്ടെത്തുന്നതിന് അൾട്രാസൗണ്ട് ഉപയോഗിക്കുന്നു.[1]