Балкански Полуостров

Балканскиот Полуостров или само Балкан — полуостров во Европа и културен и геополитички европски регион. Балканскиот Полуостров опфаќа територија од околу 550.000 км² и има жители од околу 55 милиони луѓе. Името на полуостровот е од турско потекло или поточно од турскиот збор „Balkan“ што значи „ланец пошумени шуми“^[1] Географските граници на Балканскиот Полуостров варираат во зависност кои параметри се сметаат, но најчесто се сметаат водните површини кои го заобиколуваат полуостровот како што се Црно Море, Егејско Море, Јадранско Море и реките Сава и Дунав. Како и географските, така и политичките граници на полуостровот варираат во зависност од тоа како се земаат предвид, односно врз основа на географската положба на земјите или нивната политичка соработка. Балканскиот Полуостров е познат и под терминот Југоисточна Европа.

Географски граници според линијата Сава-Купа

Географски граници според помалку познатата јадранско-црноморска линија

Географија

Од географска гледна точка полуостровот на север најчесто е дефиниран со границата: Кварнерски Залив - реката Купа - реката Сава - реката Дунав, но се среќаваат и други дефиниции за северната граница кои оваа линија ја поместуваат посеверно. Од исток, запад и југ Полуостровот е обиколен со вода. Највисок врв е Мусала во Рила (Бугарија), втор - Митикас во Олимп (Грција), трети - Вихрен во Пирин (Бугарија)

Политичка поделба

Политичка карта на Балканот.

Држави кои се целосно на Балканскиот Полуостров:

•  Албанија
•  Босна и Херцеговина
•  Бугарија
•  Грција
•  Македонија
•  Црна Гора
•  Косово

Држави кои во поголем дел се на Балканскиот Полуостров:

•  Србија - од Јужна Србија до Белград или 73%
•  Хрватска - 49% од вкупната територија
•  Словенија - 27% од вкупната територија

Држави кои се скоро надвор од Балканскиот Полуостров:

•  Романија - северна Добруџа.
•  Турција - европскиот дел.
•  Италија - мал дел од покраината Трст.

Демографија

Населението на Балканскиот Полуостров според држави е:

Држава	Население
Албанија	2.876.591[2]
Босна и Херцеговина	4.613.414[3]
Бугарија	7.928.901[4]
Хрватска	4.489.409[5]
Грција	11.257.285[6]
Косово	1.733.872[7]
Италија	236.520 во покраината Трст[8]
Македонија	2.103.721[9]
Црна Гора	620.145[10]
Романија	971.643[11] во Добруџа
Србија	7.334.935[12]
Словенија	2.038.733[13]
Турција	10.691.518[14] во европскиот дел на Турција

Забелешка: Голем дел од териториите на Хрватска и Словенија не се дел од Балканот, но во оваа табела целокупното население на овие држави е вклучено.

Балканот како тема во уметноста и во популарната култура

Балканот како тема во книжевноста

• „Амамот Балканија“ - книга на српскиот писател Владислав Бајац.^[15]
• „Старинарницата Балкан“ - книга на македонскиот писател Атанас чупоски.^[16]
• „Балкански патопис“ (Balkanski putopis) - песна на српскиот поет Миодраг Павловиќ.^[17]
• „Загатливи балкански прашалници“ - песна на македонскиот писател Славко Јаневски од 1966 година.^[18]
• „Балканец“ (Balkanac) - песна на Десанка Максимовиќ.^[19]

Балканот како мотив во музиката

• „Балкан“ - песна на рок-групата „Азра“ од 1980 година.^[20]
• „Балкан Бој“ (Balkan Boj) - песна на црногорскиот музичар Рамбо Амадеус од 1989 година.^[21]
• „Балкан“ - песна на македонската енто-група „Dragan Dautovski Quartet“.^[22]
• „Хотел Балкан“ - песна на српскиот поп-пејач Здраво Чолиќ.^[23]