Жива статуа

Жива статуа — уверливо насликан и нашминкан уличен уметник кој позира во имитација на статуа или модна кукла. Најчесто се среќаваат како улични изведувачи.^[1]

Жива статуа на судија

Овие изведувачи имаат за цел да ги измамат минувачите дека се работи за нежив предмет и неретко фигурираат во разни телевизиски емисии со скриена камера за да ги уплашат несвесните.

Историја

Олга Дезмонд гола со драперија и пиедестал

Живата слика или групите живи статуи биле мошне чести на прославите во средниот век и ренесансата, кога владетелите влегувале во некој град во свечени поворки. Групата што изедувала некаква сцена обично била качена на платформа украсена за да изгледа како споменик и поставена долж поворката.

На почетокот на XX век, германската танчерка Олга Дезмонд ја одржувала претставата „Вечер на убавина“ (Schönheitsabende) каде позирала гола имитирајќи класични статуи (живи слики). Живите статуи се употребени во култниот француски филм Деца на рајот (1945), а како изведба во живо се популаризирани со изведбите на лондонските уметници Гилберт и Џорџ во 1960-тите.

Натпревари

Светското првенство за живи статуи се одржува секоја година во Арнем, Холандија. Во 2011 г. траел два дена, имал 300 учесници (меѓу кои и аматери и деца) и привлекол 300.000 посетители.

Почнувајќи од 2000 г. Универзитет за деловни и општествени науки во Буенос Аирес, Аргентина секоја година приредува државен натпревар за живи статуи.^[2]

Како улична изведба

Живата статуа е мошне чест облик на улична изведба, особено на места со многу туристи. Изведувачот одбира стратешки добро место без сообраќај, но со многу пешаци. Бидејќи воопшто не се помрднува, минувачите напати не увидуваат дека станува збор за човек, па се изненадуваат кога „статуата“ ќе направи некакво движење или ќе им намигне. Колку пари ќе добие еден ваков изведувач зависи од тоа колку добро може да биде забележан од јавноста.

Галерија

• 
  Жива статуа во Мајами Бич
• 
  Толпа пред жива статуа
• 
  Софи Малре, светски првак во 2006 г.
• 
  Во Јубилејните градини, Лондон
• 
  Во Виена
• 
  Во Лисабон
• 
  Во Рим, Италија
• 
  Венецијанска жива статуа во Макао
• 
  Самовила во Кејптаун
• 
  Жива статуа во Леон, Мексико
• 
  Во Сиднејската уметничка галерија
• 
  Жива статуа во Епкот

Поврзано

• Жива слика

Наводи

1. Björn Lindahl (2010-03-02). „Job description: do as little as possible — Nordic Labour Journal“. Nordic Labour Journal. Work Research Institute, Oslo, commissioned by the Nordic Council of Ministers.
2. „Contest of Living Statues“. Ucesarte.uces.edu.ar. Посетено на 2014-01-23.

Надворешни врски

„Жива статуа“ на Ризницата ?

• Како да бидете жива статуа (англиски)
• Учебник по изведба на жива статуа од Аманда Палмер Архивирано на 20 декември 2016 г. (англиски)