laksamana padusi Aceh From Wikipedia, the free encyclopedia
Keumalahayati, atau disingkek Malahayati, adolah surang laksamana padusi dari Kasultanan Aceh, nan dipakiroan iduik antaro akia abaik ka-16 inggo mulo abaik ka-17.[1][2] Keumalahayati baparan pantiang dalam mamimpin angkatan lauik Aceh manjadi kakuatan nan disagani di Selat Malaka jo sakitarnyo, tamasuak dalam maadoki Portugih, Balando, jo Inggirih nan mulai masuak ka Asia Tenggara pado maso itu.[2]
Keumalahayati lahia dari kaluargo urang bangsawan, katurunan Sultan Salahuddin Syah nan mamarintah antaro 1530-1539.[3] Apaknyo Mahmud Syah jo datuaknyo Muhammad Said Syah adolah laksamana juo untuak Karajaan Aceh.[3] Keumalahayati surang adolah lulusan akademi maliter karajaan Aceh, "Askari Baitul Muqqadas", nan didirian ateh bantuan Turki.[1][4] Baliau manikah jo Mahmuddin Said, nan adolah surang laksamana juo.[5]
Di maso tu Aceh bamusuahan bana jo Portugih, nan bausao mamonopoli padagangan lado ketek (marica) di kapulauan Asia Tenggara jo Samananjuang Malaya. Katiko suaminyo maningga dalam parang malawan Portugih, Keumalahayati mambantuak pasukannyo surang.[5] Pasukan tu dinamoan pasukan "Inong Balee", nan tadiri dari jando-jando palauik Aceh nan maningga kutiko malawan Portugih.[2][6][4] Awanyo pasukannyo tadiri dari labiah kurang 1.000 urang,[4] namun bakambang inggo 2.000 urang.[7]
Keumalahayati kalah saaik parang patamo kalinyo malawan armada Portugih, namun dalam parang sasudahnyo baliau baasia mandapek kamanangan. Baliau juo nan mamimpin pasukan Aceh mangalahan kapa-kapa Balando di bawah pimpinan Cornelis de Houtman jo sudaronyo Frederick de Houtman pado taun 1599.[2][4] Cornelis tabunuah dan Frederic manjadi tawanan,[4] sampai kadatangan Gerard de Rooy dan Laurens Bickers nan diutuih dek Pangeran Maurits dari Balando taun 1601.[8][9] Hal iko indak aneh, dek manuruik catatan Kapten John Davis, armada Aceh pado maso itu tadiri dari 100 kapa parang galiung.[2][10][11][6]
Di maso kakuasoan Sultan Alauddin Riayatsyah, Keumalahayati dipicayo juo untuak manjadi protokoler karajaan.[6] Baliau lah nan manyambuik kadatangan Sir James Lancaster taun 1602,[6] nan diutuih dek Ratu Elizabeth I dari Inggirih untuak manjalin ubuangan diplomatik kaduo nagara.[1][12] Keumalahayati pulo nan maatua supayo kapa-kapa Inggirih salamaik indak kanai tangkok armada Portugih nan lah tibo juo untuak mambali lado ketek di Aceh.[12]
Kini ko baliau tatap dipandang taoromaik sabagai pahlawan bangsa dek masarakaik Aceh jo Indonesia pado umumnyo, tamasuak diabadian pulo sabagai namo-namo kapa parang, universitas, dan palabuahan.[13]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.