![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/e4/Dark_vignette_Al-Masjid_AL-Nabawi_Door800x600x300.jpg/640px-Dark_vignette_Al-Masjid_AL-Nabawi_Door800x600x300.jpg&w=640&q=50)
Muhammad
From Wikipedia, the free encyclopedia
Muḥammad (Arab: ﷴ; terjemahan: Muḥammad;[1] lafal [mʊˈħæmmæd] ( dengar)[2][3][4], salangkoknyo Muḥammad bin Abdullah bin Abdul Mutthalib bin Hasyim (lahia di Makah, 20 April 570 – maningga di Madinah, 8 Juni 632 pado umua 62 taun) adolah nabi nan rasul tarakhia manuruik umaik Islam manuruik Al-Qur'an surah Al-Ahzab:33/40. Nabi Muhammad mamuloi panyebaran ajaran Islam untuak saluruah umaik manusia jo mawarihan pamarentahan tungga Islam. Walaupun non-Muslim umumnyo manganggap Muhammad sabagai pandiri Islam, dalam pandangan Muslim, Muhammad turuik managakan ajaran tauhid untuak mangasokan Allah sabagaimano nan dibaok dek nabi jo rasul sabalunnyo sajak dari Nabi Nuh. Umaik Muslim manyabuik Muhammad jo salam panghormatan Shalallaahu 'Alayhi Wasallam sarato diiriangi salawat Nabi satiok namo Muhammad disabuik.
Lahia pado taun 570 di Makah, Muhammad malalui maso ketek sabagai yatim piatu; digadangan di bawah asuahan paktuonyo Abu Thalib. Baranjak gadang, Muhammad bakarajo sabagai padagang. Muhammad kadang-kadang mangasiangan diri ka ngalau di sabuah bukik sampai bamalam-malam untuak maranuang jo badoa; diriwayaikkan dalam umua ka-40, Muhammad didatangi dek Malaikaik Jibril sarato manarimo wahyu partamo dari Allah. Muhammad manyatoan diri sabagai utusan Allah, sabagaimano nabi-nabi nan alah Allah utuih sabalunnyo. Tigo taun sasudah wahyu partamo, Muhammad muloi badakwah sacaro tarang-tarangan, manyatokan kaasoan Allah dalam bantuak panyarahan diri malalui Islam sabagai agamo nan bana. Muhammad manarimo wahyu baransua-angsua sampai maningga dunia. Praktek atau amalan Muhammad diriwayaikan dalam hadits, dirujuak dek umaik Islam sabagai sumber hukum Islam basamo Al-Qur'an.
Muhammad basamo pangikuik awa mandapek babagai bantuak palawanan jo panyiksoan dari babarapo suku di Makah. Sairiang panganiayoan nan taruih balanjuik, Muhammad mambuliahan babarapo pangikuiknyo hijrah ka Habsyah, sabalun Muhammad mamulai misi hijrah ka Madinah pado taun 622. Paristiwa hijrah manandoi awal pananggalan Kalender Hijriah dalam Islam. Di Madinah, Muhammad manyatuan suku-suku di bawah Piagam Madinah. Sasudah salapan taun batahan dek sarangan suku-suku Makah, Muhammad mangumpuan 10.000 Muslim untuak mangapuang Mekkah. Sarangan indak mandapek palawanan nan bararti inggo Muhammad maambiak aliah kota tanpa saketek patumpahan darah. Wakatu itu Muhammad mangancuan juo patuang-patuang sakitar Ka'bah. Pado taun 632, babarapo bulan sasudah baliak ka Madinah salapeh manjalani Haji Wada, Muhammad jatuah sakik lalu wafat. Muhammad maninggaan Jazirah Arab nan alah basatu dalam pamarentahan tunggal Islam nan sabagian gadangnyo alah manarimo Islam.