From Wikipedia, the free encyclopedia
I Kharkiv na Kharkov dia tanàna any atsinanana amin' i 
Okraina, renivohitry ny faritr' i Kharkiv, eo amin' ny fihaonan' ny renirano Udy sy Lopan ary Kharkiv. Nisy mponina miisa 1 421 125 izy tamin' ny taona 2022 raha niisa 1 450 082 izany tamin' ny taona 2018.
Amin' ny teny okrainiana izy dia atao hoe Харків / Kharkiv, fa Харьков / Kharkov kosa amin' ny teny rosiana.
Fihaonan' ny lalamby sy lalana manan-danja eo anelanelan' i Môskoa sy i Donbass izy. Izy no tanàna faharoa lehibe indrindra ao Okraina, eo akaikin' ny toeram-pitrandrahana arintany ao amin' ny sahan-dranon' i Donets sy ny sahan' etona voajanahary ao Chebelinka. I Kharkiv dia mifandray amin' ny sahan' akoram-by ao Kryvyi Rih amin'ny alalan’ ny lalamby.
Ny orinasa ao Kharkiv dia miompana amin' ny fanamboarana milina fambolena sy fitaovana fitrandrahana harena an-kibon' ny tany, fitaovana mandeha amin' ny angovon' aratra sy fitaovam-piaramanidina, vokatra ara-tsimia, fitaovam-piasana madinika ary fanodinana ny vokatry ny fambolena ho sakafo. I Kharkiv dia mbola misy tsangambato manan-tantara: hita ao ny Katedraly Pokrovsky (naorina tamin' ny faran' ny taonjato faha-17), ny Fiangonana Uspensky (naorina tamin' ny faran' ny taonjato faha-18), ny Fiangonan' ny Patriarka (naorina tamin' ny taonjato faha-19) ary ny lakolosy lehibe naperaka tamin' ny taona 1812 ho fahatsiarovana ny faharesen' i Napoléon. Misy oniversite ny ao Kharkiv.
Niorin' ny Kôsaka zaparôga tamin' ny taona 1656 i Kharkov izay tanàna mimanda natao hiarovana an' i Môskoa amin' ny fanafihan' ny Tatara tamin' izany fotoana izany. Lasa foibe ara-kolontsaina sy ara-barotra izy avy eo, ary tamin' ny taona 1765 dia lasa foibem-pitantanan' i Okraina. Noho ny fanomezan-danja ny harena an-kibon' ny tany tao amin' ilay faritra, tamin' ny faran' ny taonjato faha-19, i Kharkov dia lasa foibem-pitaterana an-dalamby sy foiben' ny taozava-baventy.
Nandritra ny Ady Lehibe Voalohany dia nisy ady mahery vaika ny tao an-tanàna: ny voalohany teo amin' ny tafika alemàna sy ny tafika rosiana; avy eo nandritra ny ady an-trano, taorian' ny Revôlisiôna Rosiana, teo amin' ny Bôlsevika sy ny Tafika Fotsy. Tao no nipetrahan' ny governemantan' ny Repoblika Sôvietika Okrainiana, nanohitra ny Repoblika Mizaka Tenan' i Okraina notarihin' i Symon Petliura, miorina ao Kyev (na Kyiv).
Renivohitry ny Repoblika Sôsialista Sôvietikan' i Okraina tamin' ny taona 1920 ka hatramin' ny taona 1934 i Kharkov, ary nanomboka teo dia i Kyiv (na Kiev) indray no lasa renivohitr' i Okraina. Nandritra ny Ady Lehibe Faharoa dia nobodoin' ny tafika alemàna ilay tanàna ka be ny zavatra simba, nefa nafahan' ny Tafika Mena tamin' ny Aogositra 1943. Nantsoina hoe Kharkiv i Kharkov nanomboka tamin' ny taona 1991, rehefa nahazo ny fahaleovan-tenany i Okraina.
Nopotehin' ny tafondro rosiana i Kharkiv nandritra ny adin' i Okraina sy i Rosia tamin' ny taona 2022.
Tanàna hafa any Okraina: Bakhmut, Chernobyl, Cherson, Donetsk, Kiev, Kharkiv, Lugansk Melitopol, Mykolaiv, Odessa, Sevastopol, Sumy, Zaporizhia
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
