From Wikipedia, the free encyclopedia
Мокша, Мокшетне (Мокша ломатть), кунардонь Рава лангонь васень эряйхне, суоминь кундьяста ломатть, илякс лемневихть Равань фиттне. Мокшень тя Суоми-Равонь кяльсь Суоми-Угронь кяльхнень тъналть тарадоц. Соньдеенза малады эрзянь, маринь ди тяни кулоф мерянь, муромань, мещёрань кяльхне.
![]() |
Тя лама смузьшинь лопаса няфневихть сембе сёрматфксне сюлмафт сяка лопаконякс вельде. Саньдярят тяза Википедиень потмоширень сюлмафкс вельде, арьсек, шятьта эряви тя сюлмафксть полафтоманза эди вешф сёрматфксть сотнеманза. |
Фкя пяледа кържа мокшень ломатть эряйхть Мордовиянь автономань республикса, Рузмасторонь Федерациеса, Кучка Рава лангса. Мокшет эряйхть Самарань, Пензань, Оренбургонь аймакса, эди Татармасторса, Сибирьса, Ичкозе Шиньстяма ширеса, Украинца, Эсти масторса, Арменияса, Австралияса ди Америконь Сотксса.
Каратайхть Мокшень юромста ломатть, Татармасторонь Кама ляйса эряйхне, конат корхнихть татарокс сире мокшень валлувкс мархта. Каратайхне эсь пряснон мярьгихть "мукша".
Васенце сёрматф мяляфнемат мокшет колга васьфневихть Геродотонь покамазонза [1]. Сон сёрмадсь Скифо-Персонь торпинге колга, кона ульсь 512 к. минь пингтонк инголе ди токазь сембе тя пингонь Рава лангонь эряйхнень. Скифт панезь сарматтнень ди сявозь кядялу мъзярошка мокшень юрснон, интай синь аф ламот ди теест ульсь аш кода азорондамс ламос. I—II тёжакизотне антт, славятт, мокшетне ди эрзятне ульсть ине вии ди ине ламалувксонь калкне Шистямашире Явропса [2]. IV сядокизонь песта лама мокшет тусть гуннонь сотксост, синь полаясть Остготонь оцязорксшиснон тапамаса 377 к., меле пачкодсть Паннониянь. Мокшень камбаронь эрявикст (нокта, пандоз) пяк малады васенце гуннонь камбраз эрявикстненди, мала эрявиксне стане ина музь Шистямаширень Явропова ди Кавказса [3]. XIII сядокизонь лисематнень коряс мокшет лятфневсть тя пингонь Паннониянь ди Богемиянь эряйхнень ёткса.[4]. Мокшень ширязонь модасна Ока-Дононь ляень ёткова тя пингста ульсть гуннонь Гунивар масторть кяденьгирдикс[2]. Аттилань оцязорксшиса паннониястонь мокшет ульсть сонь ушмонц пяльксокс Рим каршес якамаса. Аркеологие коряс мокшень модатнень масторкитькссна исть полафтов IV сялокизоста VIII сядокизонь сявомок. Тя пингсь лемнихть Зърня пингокс ди Тюштянь оцязоркшикс, мъзярда сон ащесь вятиксокс мокшень, эрзянь ди иля суоми-угронь калкнень сотксонди[5]. 450 кизонди тиевсь мокшетнень алаттнень соткссь Рава лангса[6], содаф буртас лем ала[7]. Мокшетне (латинкс Moxel) лятфневихть Гийом де Рубрукть, Рашид-ад-Динть ди Йосафат Барбароть сёрмадоматненть эса.
1236 кизоть ушетксста монголонь ушмось маладсь Мокшень масторть лямбе ширезонза. Кода пачфни венгеронь монаксь Юлиан "мокшень ди эрзянь кафта оцязорхнень эзда фкясь сембе калконц ди тъналонц мархта макссь пря татархненди, омбоцесь мъзярошка ломанензон мархта тусь вирень кяшема васттненди". Рашид-ад-Динонь "Джами-ат-таварихть" ("Сёрмадоматнень кярьксть") эса пачфни, кле саразть кизоста (4 сентябрьста 1236 кизоня - 23 августковс 1237 кизоня) Джучинь цёранза Бату, Орда, Берке, Угетай канонь цёрац Кадан, Чагатаень унокоц Бури, Чингиз канонь цёрац Кулькан "састь мокшетнень, буртаснень ди арджаттнень лангс эди торпингста курок сяськозь синь". Пуреш оцязорсь арась Батунь кяденьгирдикс ди тейнза савсь сонь ушмонц мархта молемс монголхнень мархта шивалгомшири. 1241 кизоня монголонь ушмось сявозень Краку ош, Сандомир ошпанда ди Легница ош. Легница ошть ваксса тюремаса монголонь ушмось тапазь германонь ди полень ушмотне.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.